IPL 2025: രാജസ്ഥാൻ റോയൽസിൽ ഹോം കമിങ്; പരിക്കേറ്റവർക്ക് പകരക്കാരായി നാന്ദ്രെ ബർഗറും ലുവാൻ ഡി പ്രിട്ടോറിയസും ടീമിൽ
Rajasthan Royals Signings: രണ്ട് ദക്ഷിണാഫ്രിക്കൻ താരങ്ങളെ ടീമിലെത്തിച്ച് രാജസ്ഥാൻ റോയൽസ്. പരിക്കേറ്റ് പുറത്തായ സന്ദീപ് ശർമ്മയ്ക്കും നിതീഷ് റാണയ്ക്കും പകരക്കാരായാണ് താരങ്ങൾ എത്തുന്നത്.
ഐപിഎലിനെ പിടിമുറുക്കി വീണ്ടും പരിക്ക്. രാജസ്ഥാൻ റോയൽസിലെ രണ്ട് താരങ്ങളാണ് പരിക്കേറ്റ് സീസണിൽ നിന്ന് പുറത്തായത്. പേസർ സന്ദീപ് ശർമ്മയും ബാറ്റർ നിതീഷ് റാണയും ഇനി സീസണിൽ രാജസ്ഥാനായി കളിക്കില്ല. പകരം രണ്ട് ദക്ഷിണാഫ്രിക്കൻ താരങ്ങൾ ടീമിലെത്തി. ഇക്കാര്യം രാജസ്ഥാൻ റോയൽസ് തന്നെ അറിയിച്ചു.
പേസർ നാന്ദ്രെ ബർഗറും ടോപ്പ് ഓർഡർ വിക്കറ്റ് കീപ്പർ ബാറ്റർ ലുവാൻ ദ്രെ പ്രിട്ടോറിയസുമാണ് രാജസ്ഥാൻ റോയൽസിലെത്തിയ പകരക്കാർ. ഇന്ത്യൻ താരങ്ങൾക്ക് പകരം വിദേശതാരങ്ങളെ ടീമിലെത്തിച്ചത് ടീമിൻ്റെ പദ്ധതികൾ തകിടം മറിയ്ക്കുമെന്ന വിലയിരുത്തലുണ്ട്. എന്നാൽ, ഈ രണ്ട് താരങ്ങളും റോയൽസ് ഫ്രാഞ്ചൈസിക്ക് ഒപ്പമുണ്ടായിരുന്ന താരങ്ങളാണ്. നാന്ദ്രെ ബർഗർ കഴിഞ്ഞ സീസണിൽ രാജസ്ഥാൻ റോയൽസിന് വേണ്ടി കളിച്ച താരമാണ്. താരം അഞ്ച് മത്സരങ്ങളിൽ നിന്ന് ഏഴ് വിക്കറ്റ് വീഴ്ത്തിയിരുന്നു. ദക്ഷിണാഫ്രിക്കക്കായി 2023ൽ താരം അരങ്ങേറിയിരുന്നു.
ലുവാൻ ദ്രെ പ്രിട്ടോറിയസ് ആവട്ടെ ദക്ഷിണാഫ്രിക്കയിലെ എസ്എ20 ടി20 ലീഗിൽ റോയൽസ് ഫ്രാഞ്ചൈസിയായ പാൾ റോയൽസിൻ്റെ ഓപ്പണറാണ്. ഇക്കഴിഞ്ഞ സീസണിൽ ലീഗിൽ ഏറ്റവുമധികം റൺസ് നേടിയ താരമായിരുന്നു പ്രിട്ടോറിയസ്. 12 മത്സരങ്ങളിൽ നിന്ന് 166 സ്ട്രൈക്ക് റേറ്റിൽ 397 റൺസാണ് താരം കഴിഞ്ഞ സീസണിൽ നേടിയത്. 19 വയസുകാരനായ ലുവാൻ ഡി പ്രിട്ടോറിയസ് ദക്ഷിണാഫ്രിക്കയുടെ ഭാവിതാരമെന്നാണ് വിലയിരുത്തപ്പെടുന്നത്. ഇതുവരെ പ്രിട്ടോറിയസ് രാജ്യാന്തര മത്സരങ്ങളിൽ കളിച്ചിട്ടില്ല.
Also Read: IPL 2025: ‘ഇപ്പോൾ ഒന്നും പറയാനാവില്ല’; വിരമിക്കലിലെ നിഗൂഢത തുടർന്ന് എംഎസ് ധോണി
സീസണിൽ ഇനി രാജസ്ഥാണ് രണ്ട് മത്സരങ്ങളാണ് അവശേഷിക്കുന്നത്. ചെന്നൈ സൂപ്പർ കിംഗ്സിനെതിരെ ഈ മാസം 12നും പഞ്ചാബ് കിംഗ്സിനെതിരെ 16നുമാണ് മത്സരങ്ങൾ. ഈ രണ്ട് മത്സരങ്ങളിൽ വിജയിച്ചാലും രാജസ്ഥാന് പ്ലേ ഓഫ് കളിക്കാനാവില്ല. 12 മത്സരങ്ങളിൽ 9 ഉം തോറ്റ രാജസ്ഥാൻ ആറ് പോയിൻ്റുമായി നിലവിൽ പോയിൻ്റ് ടേബിളിൽ ഒൻപതാം സ്ഥാനത്താണ്. ഇതോടെ രാജസ്ഥാൻ പ്ലേഓഫിൽ നിന്ന് പുറത്താവുകയും ചെയ്തു.
