IPL 2025: സഞ്ജുവിൻ്റെ രാജസ്ഥാന് ഇന്ന് ആദ്യ മത്സരം; എതിരാളികൾ കരുണയില്ലാത്ത സൺറൈസേഴ്സ് ഹൈദരാബാദ്

പാറ്റ് കമ്മിൻസ്, സഞ്ജു സാംസൺ

ഐപിഎലിൽ ഇന്ന് രാജസ്ഥാൻ റോയൽസ് ആദ്യ മത്സരത്തിനിറങ്ങും. കരുത്തരും കഴിഞ്ഞ സീസണിലെ റണ്ണേഴ്സ് അപ്പുമായ സൺറൈസേഴ്സ് ഹൈദരാബാദാണ് എതിരാളികൾ. ഹൈദരാബാദിൻ്റെ തട്ടകമായ ഉപ്പൽ രാജീവ് ഗാന്ധി ഇൻ്റർനാഷണൽ സ്റ്റേഡിയത്തിൽ ഉച്ചകഴിഞ്ഞ് 3.30ന് മത്സരം ആരംഭിക്കും. പരിക്കേറ്റ സഞ്ജു സാംസൺ ഇംപാക്ട് താരമായി കളിക്കുന്നതിനാൽ റിയാൻ പരഗ് ആണ് രാജസ്ഥാനെ നയിക്കുക.

ഫസലുൽ ഹഖ് ഫറൂഖി, മഹീഷ് തീക്ഷണ എന്നിവരിൽ ഒരാൾ മാത്രമേ ഫൈനൽ ഇലവനിലെത്തൂ എന്നതാണ് രാജസ്ഥാൻ്റെ ഏറ്റവും വലിയ പ്രതിസന്ധി. ജോഫ്ര ആർച്ചർ, തുഷാർ ദേശ്പാണ്ഡെ, സന്ദീപ് ശർമ്മ എന്നീ മൂന്ന് പേസർമാർ ടീമിലുണ്ട്. ഇവർക്കൊപ്പം നാലാമതൊരു പേസർ കൂടി ടീമിൽ വേണമോ എന്നത് മാനേജ്മെൻ്റിൻ്റെ തന്ത്രങ്ങൾക്കനുസരിച്ചാവും. വനിന്ദു ഹസരങ്ക മാത്രമാണ് ടീമിലെ സ്പിന്നർ. റിയാൻ പരഗ്, നിതീഷ് റാണ എന്നിവർ ചേർന്ന് മൂന്നോ നാലോ ഓവറിൻ്റെ പാർട് ടൈം സ്പിൻ നൽകും. അതുകൊണ്ട് തന്നെ ബൗളർമാരെ എങ്ങനെ ഉപയോഗിക്കുമെന്നത് രാജസ്ഥാന് നിർണായകമാണ്.

യശസ്വി ജയ്സ്വാൾ, സഞ്ജു സാംസൺ, നിതീഷ് റാണ, റിയാൻ പരഗ്, ഷിംറോൺ ഹെട്മെയർ, ധ്രുവ് ജുറേൽ, ശുഭം ദുബേ, വനിന്ദു ഹസരങ്ക, ജോഫ്ര ആർച്ചർ, തുഷാർ ദേശ്പാണ്ഡെ, സന്ദീപ് ശർമ്മ എന്നിങ്ങനെയാവും ഫൈനൽ ഇലവൻ. ഇംപാക്ട് പ്ലയറായി സാഹചര്യമനുസരിച്ച് ഫസലുൽ ഹഖ് ഫറൂഖിയോ മഹീഷ് തീക്ഷണയോ ടീമിലെത്തും.

സൺറൈസേഴ്സിനെ പരിഗണിക്കുമ്പോൾ ബൗളിംഗ് ഡിപ്പാർട്ട്മെൻ്റ് കഴിഞ്ഞ സീസണിലെയത്ര ശക്തമല്ല. കഴിഞ്ഞ സീസണിൽ ടീമിൻ്റെ പ്രകടനങ്ങളിൽ നിർണായക പങ്കുവഹിച്ച ഭുവനേശ്വർ കുമാറും ടി നടരാജനും ഇത്തവണ ടീമിലില്ല. പകരമെത്തിയ മുഹമ്മദ് ഷമിയും ഹർഷൽ പട്ടേലും സിമർജീത് സിംഗുമൊന്നും അത്ര പോര. പോയ സീസണിൽ തന്നെ മാരകമായിരുന്ന ബാറ്റിംഗ് നിരയിലേക്ക് ഇഷാൻ കിഷനും അഭിനവ് മനോഹറും എത്തുന്നതാണ് ഹൈലൈറ്റ്. മലയാളി താരം സച്ചിൻ ബേബിയ്ക്ക് അവസരം ലഭിച്ചേക്കും. ഷമി, ഹർഷൽ, കമ്മിൻസ് എന്നിവരാവും പേസർമാർ. സാമ്പയും രാഹുൽ ചഹാറും സ്പിന്നർമാരായി എത്തും.