Lionel Messi India Tour 2025 : അടുത്ത വിൻഡോ വരെ കാത്തിരിക്കേണ്ട! മെസിയെ കാണാൻ ഡിസംബറിൽ ഹൈദരാബാദിൽ പോയാൽ മതി

Lionel Messi

ഹൈദരാബാദ് : ലയണൽ മെസി നയിക്കുന്ന ലോകകപ്പ് ജേതാക്കളായ അർജൻ്റീന ടീം ഈ വർഷം ഇനി കേരളത്തിലേക്ക് വരില്ലയെന്ന് ഏകദേശം ഉറപ്പായിരിക്കുകയാണ്. ലയണൽ മെസിയെ കാണാൻ സാധിക്കില്ലയെന്ന് കരുതിയവർക്കിതാ അവസരം. അടുത്ത മാസം ഡിസംബറിൽ ഹൈദരാബാദ് വരെ പോയാൽ മതി. ഗോട്ട് ഇന്ത്യ ടൂർ 2025ൻ്റെ ഭാഗമായി അർജൻ്റീനയുടെ ഫുട്ബോൾ ഇതിഹാസം ഡിസംബർ 13ന് ഹൈദരാബാദിലേക്ക് വരികയാണ്.

നേരത്തെ മെസിയുടെ ഇന്ത്യ പര്യടനം കൊൽക്കത്ത, മുംബൈ, ഡൽഹി എന്നീ നഗരങ്ങളെ മാത്രം കേന്ദ്രീകരിച്ചായിരുന്നു. ഈ പട്ടികയിലേക്ക് ദക്ഷിണേന്ത്യൻ മെട്രോ നഗരമായ ഹൈദാരാബാദിൻ്റെ പേരും ചേർക്കപ്പെട്ടിരിക്കുകയാണ്. ഡിസംബർ 13നാണ് മെസി ഹൈദാരാബാദിൽ എത്തുക. ഉപ്പൽ രാജീവ് ഗാന്ധി രാജ്യാന്തര സ്റ്റേഡിയത്തിലോ ഗച്ചിബൗളി സ്റ്റേഡിയത്തിലോ ആയിരിക്കും മെസി ആരാധകരെ അഭിസംബോധന ചെയ്യുക.

ALSO READ : Kerala Blasters: മോഹന്‍ ബഗാന്റെ പാതയില്‍ മറ്റ് ക്ലബുകളും; കേരള ബ്ലാസ്‌റ്റേഴ്‌സും പ്രവര്‍ത്തനങ്ങള്‍ നിര്‍ത്തിവച്ചു, ഐഎസ്എല്‍ പ്രതിസന്ധി ഗുരുതരം

മെസിയുടെ ഇന്ത്യൻ പര്യടനത്തിൻ്റെ സ്പോൺസർമാർ തെലങ്കാന മുഖ്യമന്ത്രി രേവന്ത് റെഡ്ഡിയുമായി ചർച്ച നടത്തിയതിന് ശേഷമാണ് ഗോട്ട് ഇന്ത്യ ടൂർ ഹൈദരാബാദിലേക്ക് കൂടി നീട്ടുന്നത്. മെസിയെ കൂടാതെ ഇൻ്റർ മിയാമിയിലെ സഹതാരങ്ങളായ ലൂയിസ് സുവാരെസും റൊഡ്രിഗോ ഡി പോളും പര്യടനത്തിൽ അർജൻ്റീന ഇതിഹാസത്തിനൊപ്പമുണ്ടാകും. മെസിയെ തെലങ്കാന റൈസിങ് 2047 ൻ്റെ ആഗോള ബ്രാൻഡ് അംബാസറാകാൻ ക്ഷണിക്കാൻ സർക്കാർ തീരുമാനിച്ചിട്ടുണ്ട്.

ഹൈദാരാബാദിലെ ടിക്കറ്റ് വിൽപന നിശ്ചിയിട്ടില്ല. 3,500 രൂപയാണ് കൊൽക്കത്തയിലെ പരിപാടിക്കേർപ്പെടുത്തിയിരിക്കുന്ന ഏറ്റവും കുറഞ്ഞ ടിക്കറ്റ് നിരക്ക്. ഡിസ്ട്രിക് ആപ്പിലൂടെയാണ് ടിക്കറ്റ് വിൽപന നടത്തുക.