Hajj 2026 : തിരക്ക് നിയന്ത്രിക്കാൻ ഇലക്ട്രോണിക് സംവിധാനങ്ങളും വിപുലമായ ക്യാമ്പുകളും… ഹാജിമാരെ വരവേൽക്കാൻ സൗദി സജ്ജം

റിയാദ്: ലോകത്തിന്റെ വിവിധ ഭാഗങ്ങളിൽ നിന്നുള്ള വിശ്വാസികൾ എത്തിത്തുടങ്ങുന്ന പശ്ചാത്തലത്തിൽ, 2026-ലെ ഹജ്ജ് സീസൺ സുരക്ഷിതവും സുഗമവുമാക്കാൻ വിപുലമായ ഒരുക്കങ്ങളുമായി സൗദി അറേബ്യ. ഹജ്ജ് കർമ്മങ്ങൾക്കായി എത്തുന്നവർക്ക് ഏറ്റവും മികച്ച സേവനങ്ങൾ ഉറപ്പാക്കാൻ എല്ലാ സർക്കാർ സംവിധാനങ്ങളും സജ്ജമാകണമെന്ന് കിരീടാവകാശി മുഹമ്മദ് ബിൻ സൽമാൻ രാജകുമാരൻ ഉത്തരവിട്ടു.

സൽമാൻ രാജാവിന് വേണ്ടി മന്ത്രിസഭാ യോഗത്തിൽ സംസാരിക്കുകയായിരുന്നു അദ്ദേഹം. മക്കയിലെയും മദീനയിലെയും പുണ്യസ്ഥലങ്ങളിൽ എത്തുന്ന അതിഥികളെ അദ്ദേഹം സ്വാഗതം ചെയ്യുകയും തീർത്ഥാടകരുടെ സേവനത്തിനായി രാജ്യം പ്രതിജ്ഞാബദ്ധമാണെന്ന് ആവർത്തിക്കുകയും ചെയ്തു.

പ്രധാന തയ്യാറെടുപ്പുകൾ

വിമാനത്താവളങ്ങൾ, കര-സമുദ്ര അതിർത്തികൾ എന്നിവിടങ്ങളിൽ തീർത്ഥാടകരെ സ്വീകരിക്കുന്നതിന് സുരക്ഷാ-പ്രതിരോധ സംവിധാനങ്ങൾ പൂർണ്ണമായും പ്രവർത്തനസജ്ജമാക്കാൻ നിർദ്ദേശം നൽകി. ഹജ്ജ്-ഉംറ മന്ത്രി തൗഫീഖ് അൽ റബിയ മിനായിലെ ക്യാമ്പുകൾ സന്ദർശിച്ച് സൗകര്യങ്ങൾ വിലയിരുത്തി. സേവനങ്ങളുടെ ഗുണനിലവാരം ഉറപ്പാക്കാൻ ഇത്തവണ നേരത്തെ തന്നെ പ്രവർത്തനങ്ങൾ ആരംഭിച്ചിരുന്നു.

Also Read – നിങ്ങളുടെ മെട്രോ യാത്ര ഇനി ഭൂമിക്കടിയിലൂടെ; ദുബായ് മെട്രോ ഗോൾഡ് ലൈൻ 2032-ൽ വരുന്നു

തിരക്ക് നിയന്ത്രിക്കുന്നതിനും തീർത്ഥാടകരുടെ സുരക്ഷ ഉറപ്പാക്കുന്നതിനുമായി ഇത്തവണ പുതിയ ഇലക്ട്രോണിക് നിരീക്ഷണ സംവിധാനങ്ങൾ ഏർപ്പെടുത്തിയിട്ടുണ്ട്. തീർത്ഥാടകരുടെ നീക്കങ്ങൾ നിയന്ത്രിക്കുന്നതിനും കൃത്യമായ നിർദ്ദേശങ്ങൾ നൽകുന്നതിനും ഡിജിറ്റൽ ബോർഡുകളും സജ്ജമാക്കി.

സൗദി അറേബ്യയുടെ വിഷൻ 2030-ന്റെ ഭാഗമായുള്ള പിൽഗ്രിം എക്സ്പീരിയൻസ് പ്രോഗ്രാമിന് കീഴിൽ തീർത്ഥാടകരുടെ അനുഭവം കൂടുതൽ മെച്ചപ്പെടുത്താനാണ് ലക്ഷ്യമിടുന്നത്. ലോകത്തെ ഏറ്റവും വലിയ ജനസംഗമങ്ങളിലൊന്നായ ഹജ്ജിനായി അത്യാധുനിക സാങ്കേതിക വിദ്യകളും സുരക്ഷാ മാനദണ്ഡങ്ങളുമാണ് രാജ്യം ഒരുക്കിയിരിക്കുന്നത്.

യുഎഇയിൽ ബലിപെരുന്നാളിന് 6 ദിവസം അവധി ലഭിച്ചേക്കും

2026-ലെ ഈദ് അൽ അദ്ഹ (ബലിപെരുന്നാൾ) അവധി സംബന്ധിച്ച ജ്യോതിശാസ്ത്ര പ്രവചനങ്ങൾ ഷാർജ സ്പേസ് ആൻഡ് അസ്ട്രോണമി ഹബ് പുറത്തുവിട്ടു. കണക്കുകൂട്ടലുകൾ ശരിയാവുകയാണെങ്കിൽ, യുഎഇയിലെ പ്രവാസികൾക്കും സ്വദേശികൾക്കും മെയ് മാസത്തിൽ തുടർച്ചയായി ആറ് ദിവസത്തെ അവധി ലഭിക്കാൻ സാധ്യതയുണ്ട്. യുഎഇയിലെ പൊതു അവധി നിയമങ്ങൾ അനുസരിച്ച് അറഫാ ദിനവും ഈദിന്റെ ആദ്യ മൂന്ന് ദിവസങ്ങളുമാണ് അവധി ലഭിക്കാറുള്ളത്. ഇതനുസരിച്ചുള്ള അവധി ക്രമം താഴെ പറയുന്ന രീതിയിലാകാം:

• മെയ് 26 (ചൊവ്വാഴ്ച) : അറഫാ ദിനം
• മെയ് 27 (ബുധനാഴ്ച) : ഈദ് ഒന്നാം ദിനം
• മെയ് 28 (വ്യാഴാഴ്ച) : ഈദ് രണ്ടാം ദിനം
• മെയ് 29 (വെള്ളിയാഴ്ച) : ഈദ് മൂന്നാം ദിനം
• മെയ് 30 (ശനിയാഴ്ച) : വാരാന്ത്യ അവധി
• മെയ് 31 (ഞായറാഴ്ച) : വാരാന്ത്യ അവധി

തുടർച്ചയായ ആറ് ദിവസത്തെ അവധി ലഭിക്കുന്നത് നാട്ടിൽ പോകാൻ ആഗ്രഹിക്കുന്ന പ്രവാസികൾക്കും വിനോദയാത്രകൾ പ്ലാൻ ചെയ്യുന്നവർക്കും വലിയ ആശ്വാസമാകും. എങ്കിലും, ഔദ്യോഗിക മാസപ്പിറവി ദർശനത്തിന് ശേഷം മാത്രമേ യുഎഇ ഭരണകൂടം ഇത് സംബന്ധിച്ച അന്തിമ പ്രഖ്യാപനം നടത്തുകയുള്ളൂ.