PPF Accounts: രണ്ട് പിപിഎഫ് അക്കൗണ്ടുകൾ തുറക്കാനാകുമോ? ഇക്കാര്യങ്ങൾ അറിഞ്ഞിരിക്കണം

പബ്ലിക് പ്രൊവിഡന്റ് ഫണ്ട് അഥവാ പിപിഎഫ് ഇന്ത്യക്കാർക്കിടയിൽ ഏറ്റവും പ്രചാരത്തിലുള്ള  സേവിംഗ്സ് ഓപ്ഷനുകളിൽ ഒന്നാണ്. സുരക്ഷിതമായ വരുമാനം മാത്രമല്ല, നികുതി ആനുകൂല്യങ്ങളും ഇവ നൽകുന്നുണ്ട്. എന്നാൽ ഒരു വ്യക്തിക്ക് ഒന്നിൽ കൂടുതൽ പിപിഎഫ് അക്കൗണ്ടുകൾ തുറക്കാൻ സാധിക്കുമോ?

ഒരു വ്യക്തി, ഒരു അക്കൗണ്ട്
സർക്കാർ നിയന്ത്രണങ്ങൾ അനുസരിച്ച്, നിങ്ങൾക്ക് സ്വന്തം പേരിൽ ഒരു പിപിഎഫ് അക്കൗണ്ട് മാത്രമേ ഉണ്ടാകാൻ പാടുള്ളൂ. നിങ്ങൾ വിവിധ പോസ്റ്റ് ഓഫീസുകളിലോ ബാങ്കുകളിലോ പോയാലും, ഒന്നിലധികം പിപിഎഫ് അക്കൗണ്ടുകൾ തുറക്കാൻ കഴിയില്ല. അങ്ങനെ ചെയ്താൽ ആ അധിക അക്കൗണ്ടുകൾ അസാധുവായി കണക്കാക്കും. രണ്ടാമത്തെ അക്കൗണ്ടിൽ നിങ്ങൾ നിക്ഷേപിക്കുന്ന പണം തിരികെ ലഭിക്കും, എന്നാൽ അതിൽ നിന്ന് പലിശ ലഭിക്കില്ല.

കുട്ടികൾക്കായി പിപിഎഫ് അക്കൗണ്ടുകൾ

നിങ്ങൾക്ക് ഒന്നിൽ കൂടുതൽ അക്കൗണ്ടുകൾ തുറക്കാൻ കഴിയില്ലെങ്കിലും, നിങ്ങളുടെ പ്രായപൂർത്തിയാകാത്ത കുട്ടിക്ക് വേണ്ടി പിപിഎഫ് അക്കൗണ്ട് തുറക്കാൻ സാധിക്കും. കുട്ടി പ്രായപൂർത്തിയാകാത്ത സാഹചര്യത്തിൽ, നിങ്ങളായിരിക്കും അക്കൗണ്ടിന്റെ രക്ഷാധികാരി.

ALSO READ: മക്കള്‍ക്ക് 2 കോടി സമ്മാനിച്ചാലോ? അതിനായി 18ാം പിറന്നാളിന് ഇതുമാത്രം ചെയ്താല്‍ മതി

എന്നാൽ, നിങ്ങളുടെ അക്കൗണ്ടിലെയും കുട്ടിയുടെ അക്കൗണ്ടിലെയും വാർഷിക നിക്ഷേപം ഒരുമിച്ച് 1.5 ലക്ഷം രൂപയിൽ കൂടാൻ പാടില്ല. ഉദാഹരണത്തിന്, നിങ്ങൾ ഒരു വർഷം നിങ്ങളുടെ സ്വന്തം പിപിഎഫ് അക്കൗണ്ടിൽ ഒരു ലക്ഷം രൂപ നിക്ഷേപിച്ചാൽ, അതേ വർഷം നിങ്ങളുടെ കുട്ടിയുടെ പിപിഎഫ് അക്കൗണ്ടിൽ 50,000 രൂപ മാത്രമേ നിക്ഷേപിക്കാൻ സാധിക്കുകയുള്ളൂ.

ജോയിന്റ് അക്കൗണ്ടുകൾ 
പിപിഎഫ് അക്കൗണ്ടുകൾ തികച്ചും വ്യക്തിഗതമാണ്. ഇതിൽ ജോയിന്റ് അക്കൗണ്ട് തുറക്കാൻ കഴിയില്ല. ഒരു കുട്ടിയുടെ പിപിഎഫ് അക്കൗണ്ടിന് പോലും, ഒരു പേര് മാത്രമേ ഉണ്ടാകൂ.

അറിയാതെ ഒന്നിൽ കൂടുതൽ അക്കൗണ്ട് തുറന്നാൽ?
അബദ്ധത്തിൽ രണ്ട് പിപിഎഫ് അക്കൗണ്ടുകൾ തുറന്നാൽ എത്രയും വേഗം ബാങ്കിനെയോ, പോസ്റ്റ് ഓഫീസിനെയോ, ധനകാര്യ മന്ത്രാലയത്തെയോ അറിയിക്കുക. അവർ അതിനെ അസാധുവായി കണക്കാക്കുകയും അതിൽ നിങ്ങൾ നിക്ഷേപിച്ച പണം തിരികെ നൽകുകയും ചെയ്യും. എന്നാൽ  ആ തുകയ്ക്ക് നിങ്ങൾക്ക് പലിശ ലഭിക്കില്ല