Kerala Rain School Holiday: കനത്ത മഴയ്ക്ക് സാധ്യത; നാളെ ഈ ജില്ലയിലെ വിദ്യാഭ്യാസ സ്ഥാപനങ്ങൾക്ക് അവധി
Kerala Schools Rain Holiday June 28: ശനിയാഴ്ച കുട്ടികൾക്ക് ക്ലാസ് വയ്ക്കേണ്ടതില്ലെന്ന് ജില്ലാ കളക്ടർ അർജുൻ പാണ്ഡ്യൻ നിർദ്ദേശം നൽകി. ജില്ലയിൽ നാളെ യെല്ലോ അലർട്ടാണ് പ്രഖ്യാപിച്ചിട്ടുള്ളത്.
തൃശ്ശൂർ : സംസ്ഥാനത്ത് കനത്ത മഴ തുടരുന്ന സാഹചര്യത്തിൽ നാളെ തൃശ്ശൂർ ജില്ലയിൽ വിദ്യാഭ്യാസ സ്ഥാപനങ്ങൾക്ക് ജില്ല കളക്ടർ അവധി പ്രഖ്യാപിച്ചു. ശനിയാഴ്ച കുട്ടികൾക്ക് ക്ലാസ് വയ്ക്കേണ്ടതില്ലെന്ന് ജില്ലാ കളക്ടർ അർജുൻ പാണ്ഡ്യൻ നിർദ്ദേശം നൽകി. ജില്ലയിൽ നാളെ യെല്ലോ അലർട്ടാണ് പ്രഖ്യാപിച്ചിട്ടുള്ളത്.
അതേസമയം നാളെ പീച്ചി ഡാം ഷട്ടര് നാളെ ഉയര്ത്തുമെന്ന് ജില്ല കളക്ടർ അറിയിച്ചു. മണലി, കരുവന്നൂര് പുഴകളുടെ തീരത്തുള്ളവര് ജാഗ്രത പുലര്ത്തണമെന്നും അറിയിപ്പിൽ പറയുന്നു. മഴമൂലം പീച്ചി ഡാമിലേക്ക് നീരൊഴുക്ക് വര്ധിച്ചതിനാല് ജലനിരപ്പ് നിയന്ത്രിക്കുന്നതിനായി നാളെ (ജൂണ് 28) രാവിലെ 11 മുതല് ഡാമിന്റെ നാല് ഷട്ടറുകളും നാല് ഇഞ്ച് (പത്ത് സെ.മി) വീതം തുറന്ന് മണലിപ്പുഴയിലേക്ക് വെള്ളം ഒഴുക്കും. മണലി, കരുവന്നൂര് പുഴകളില് നിലവിലെ ജലനിരപ്പില്നിന്നും പരമാവധി 30 സെ.മി കൂടി ഉയരാന് സാധ്യതയുള്ളതിനാല് തീരത്ത് താമസിക്കുന്നവര് ജാഗ്രത പുലര്ത്തണം.
Also Read:സംസ്ഥാനത്ത് കനത്ത മഴ; രണ്ട് ജില്ലകളിൽ ഓറഞ്ച് അലർട്ട്; പ്രളയഭീതിയിൽ മലയോരം
സംസ്ഥാനത്ത് രണ്ടു ദിവസംകൂടി ശക്തമായ മഴ തുടരുമെന്നാണ് കേന്ദ്രാ കാലാവസ്ഥ വകുപ്പിന്റെ മുന്നറിയിപ്പ്. ശനി, ഞായർ ദിവസങ്ങളിൽ ഒറ്റപ്പെട്ടയിടങ്ങളിൽ മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റിനു സാധ്യതയുണ്ടെന്നും മുന്നറിയിപ്പിൽ പറയുന്നു. നാളെ പത്തനംതിട്ട, കോട്ടയം, ഇടുക്കി, മലപ്പുറം, വയനാട് ജില്ലകളില് ഓറഞ്ച് അലര്ട്ടും മറ്റ് എല്ലാ ജില്ലകളിലും യെല്ലോ അലര്ട്ട് ആണ്. ഞായറാഴ്ച പത്തനംതിട്ട, കോട്ടയം, ഇടുക്കി, മലപ്പുറം, വയനാട് ജില്ലകളിൽ മാത്രമാണ് യെല്ലോ അലർട്ടുള്ളത്.
മുല്ലപ്പെരിയാര് ഡാമിന്റെ ഷട്ടറുകൾ നാളെ തുറന്നേക്കുമെന്ന് സൂചന. അണക്കെട്ടിലെ ജലനിരപ്പ് 136 അടി ആകുമ്പോൾ ഷട്ടറുകൾ തുറക്കുമെന്ന് തമിഴ്നാട് ജലസേചന വകുപ്പ് അറിയിച്ച സാഹചര്യത്തിൽ ഇടുക്കി ജില്ലാ ഭരണകൂടം മുന്നൊരുക്കങ്ങൾ പൂർത്തിയാക്കുന്നു. നിലവിൽ 135 അടിയാണ് ജലനിരപ്പ്. ഇതിന്റെ ഭാഗമായി പെരിയാർ, മഞ്ജുമല, ഉപ്പുതുറ ,ഏലപ്പാറ, അയ്യപ്പൻകോവിൽ, കാഞ്ചിയാർ ആനവിലാസം, ഉടുമ്പഞ്ചോല എന്നിവിടങ്ങളിൽ ആളുകൾക്ക് ജാഗ്രത നിർദേശം നൽകിയിട്ടുണ്ട്. ഇവിടങ്ങളിലെ 883 കുടുംബങ്ങളെ ഇന്ന് രാത്രിയോടെ മാറ്റാൻ ജില്ലാ കലക്ടർ വി.വിഗ്നേശ്വരി റവന്യൂ, പൊലീസ് അധികാരികൾക്ക് നിർദേശം നൽകി. ഇവർക്കായി ഇരുപതിലധികം ക്യാംപുകൾ ഒരുക്കി കഴിഞ്ഞു.
