SBI Recruitment 2026: എസ്ബിഐയിൽ വീണ്ടും ഒഴിവുകൾ; എവിടെ എങ്ങനെ അപേക്ഷിക്കാം?

ബാങ്കിംഗ് മേഖലയിൽ ഉന്നത തസ്തികയിൽ മികച്ച ശമ്പളത്തിൽ ജോലി ആഗ്രഹിക്കുന്ന മുൻ സൈനിക ഓഫീസർമാർക്ക് സുവർണ്ണാവസരം. സ്റ്റേറ്റ് ബാങ്ക് ഓഫ് ഇന്ത്യ (SBI) സ്പെഷ്യലിസ്റ്റ് കേഡർ ഓഫീസർ റിക്രൂട്ട്‌മെന്റിന്റെ ഭാഗമായി 60 ഒഴിവുകളിലേക്ക് പുതിയ വിജ്ഞാപനം പുറപ്പെടുവിച്ചു. മാനേജർ (സെക്യൂരിറ്റി), ഡെപ്യൂട്ടി മാനേജർ (സെക്യൂരിറ്റി) എന്നീ വിഭാ​ഗങ്ങളിലാണ് ഒഴിവുള്ളത്. അംഗീകൃത സർവ്വകലാശാലയിൽ നിന്നുള്ള ബിരുദമാണ് അടിസ്ഥാന യോഗ്യത. ഇന്ത്യൻ കരസേന, നാവികസേന, വ്യോമസേന അല്ലെങ്കിൽ അർദ്ധസൈനിക വിഭാഗങ്ങളിൽ ഓഫീസർമാരായി സേവനമനുഷ്ഠിച്ച മുൻപരിചയം ഉണ്ടായിരിക്കണം.

2026 ഒക്ടോബർ 31-ലെ കണക്കനുസരിച്ച് ഉദ്യോഗാർത്ഥികൾക്ക് 25 വയസ്സ് മുതൽ 40 വയസ്സ് വരെ പ്രായപരിധിയുണ്ടായിരിക്കണം. സംവരണ വിഭാഗങ്ങൾക്ക് നിയമാനുസൃതമായ പ്രായയിളവ് ബാധകമാണ്. നിയമനം ലഭിക്കുന്നവർക്ക് ആകർഷകമായ അടിസ്ഥാന ശമ്പളമാണ് എസ്ബിഐ വാഗ്ദാനം ചെയ്യുന്നത്. തിരഞ്ഞെടുക്കുന്ന മാനേജർ (സെക്യൂരിറ്റി) വിഭാ​ഗത്തിന് 85,920 രൂപയാണ് അടിസ്ഥാന ശമ്പളം. ഡെപ്യൂട്ടി മാനേജർ (സെക്യൂരിറ്റി) വിഭാ​ഗത്തിൽ തിരഞ്ഞെടുക്കുന്നവർക്ക് 64,820 രൂപയാണ് അടിസ്ഥാന ശമ്പളം.

ALSO READ: 2027-ലെ പരീക്ഷാതീയതികള്‍ പുറത്തുവിട്ട് സിബിഎസ്ഇ

SBI-യുടെ ഔദ്യോഗിക വെബ്‌സൈറ്റായ sbi.bank.in-ലെ കരിയേഴ്‌സ് പേജ് വഴി ഓൺലൈനായി അപേക്ഷിക്കാം. താല്പര്യമുള്ളവർക്ക് നവംബർ 25 വരെ അപേക്ഷിക്കാവുന്നതാണ്. സൈനിക അല്ലെങ്കിൽ അർദ്ധസൈനിക വിഭാഗങ്ങളിൽ ഓഫീസർ തലത്തിലുള്ള യോഗ്യതാപരമായ പ്രവൃത്തിപരിചയമുള്ള ഉദ്യോഗാർത്ഥികൾക്ക് വേണ്ടിയുള്ളതാണ് ഈ നിയമനം.

യോ​ഗ്യതയും മറ്റ് വിവരങ്ങളും

മാനേജർ (സെക്യൂരിറ്റി) തസ്തികയിലേക്കുള്ള മാനദണ്ഡങ്ങൾ:

ഇന്ത്യൻ കരസേനയിൽ മേജർ റാങ്കിലോ അതിന് മുകളിലോ ഉള്ള ഉദ്യോഗസ്ഥനായിരിക്കണം (അല്ലെങ്കിൽ ഇന്ത്യൻ നാവികസേനയിലോ വ്യോമസേനയിലോ തത്തുല്യ റാങ്ക്). കൂടാതെ, കമ്മീഷൻഡ് ഓഫീസറായി കുറഞ്ഞത് 10 വർഷത്തെ സേവനപരിചയവും ഉണ്ടായിരിക്കണം. അർദ്ധസൈനിക വിഭാഗങ്ങളിൽ ഡെപ്യൂട്ടി കമാൻഡന്റ് റാങ്കിലോ അതിന് മുകളിലോ ഉള്ള ഉദ്യോഗസ്ഥനായിരിക്കണം. കൂടാതെ, ഈ സേനകളിൽ ഓഫീസറായി കുറഞ്ഞത് 10 വർഷത്തെ സേവനപരിചയവും ഉണ്ടായിരിക്കണം.

എസ്ബിഐ ഡെപ്യൂട്ടി മാനേജർ (സെക്യൂരിറ്റി) തസ്തികയിലേക്കുള്ള മാനദണ്ഡങ്ങൾ:

ഇന്ത്യൻ കരസേനയിൽ ക്യാപ്റ്റൻ റാങ്കിലോ അതിനു മുകളിലോ ഉള്ള ഉദ്യോഗസ്ഥനായിരിക്കണം (അല്ലെങ്കിൽ ഇന്ത്യൻ നാവികസേനയിലോ വ്യോമസേനയിലോ ഇതിന് തുല്യമായ റാങ്ക്). കൂടാതെ, കമ്മീഷൻഡ് ഓഫീസറായി കുറഞ്ഞത് 5 വർഷത്തെ സേവനപരിചയവും ഉണ്ടായിരിക്കണം. അർദ്ധസൈനിക വിഭാഗങ്ങളിൽ അസിസ്റ്റന്റ് കമാൻഡന്റ് റാങ്കിലോ അതിനു മുകളിലോ ഉള്ള ഉദ്യോഗസ്ഥനായിരിക്കണം. കൂടാതെ, ഈ സേനകളിൽ ഓഫീസറായി കുറഞ്ഞത് 5 വർഷത്തെ സേവനപരിചയവും ഉണ്ടായിരിക്കണം.

തിരഞ്ഞെടുക്കപ്പെടുന്ന ഉദ്യോഗസ്ഥർക്ക്, എസ്ബിഐ ചട്ടങ്ങൾ പ്രകാരം, ബാധകമായ ക്ഷാമബത്ത, വീട്ടുവാടക അലവൻസ്, സിറ്റി കോമ്പൻസേറ്ററി അലവൻസ്, പ്രൊവിഡന്റ് ഫണ്ട്, നാഷണൽ പെൻഷൻ സിസ്റ്റം, ലീവ് ഫെയർ കൺസെഷൻ, ചികിത്സാ സൗകര്യങ്ങൾ എന്നിവയും മറ്റ് ആനുകൂല്യങ്ങളും ലഭിക്കുന്നതിന് അർഹതയുണ്ടായിരിക്കും.

English Summary:

SBI60 Manager (Security) and Deputy Manager (Security) vacancies under Specialist Cadre Officer recruitment on a regular basis. Candidates must be graduates with the prescribed experience as officers in the Indian Army, Navy, Air Force or paramilitary forces.