Vijay Deverakonda: ആദിവാസികളെ അധിക്ഷേപിച്ചു; വിജയ് ദേവരകൊണ്ടയ്ക്കെതിരെ കേസ്
Case Filed Against Actor Vijay Deverakonda: ആദിവാസി വിഭാഗത്തെ അധിക്ഷേപിക്കുന്ന പരാമർശം നടത്തിയതിനാണ് നടനെതിരെ കേസെടുത്തിരിക്കുന്നത്. പട്ടികജാതി/പട്ടികവര്ഗങ്ങള്ക്കെതിരായ അതിക്രമങ്ങള് തടയാനുള്ള നിയമപ്രകാരമാണ് കേസെടുത്തത്.
തെലുങ്ക് നടൻ വിജയം ദേവരകൊണ്ടയ്ക്കെതിരെ കേസ്. ആദിവാസി വിഭാഗത്തെ അധിക്ഷേപിക്കുന്ന പരാമർശം നടത്തിയതിനാണ് നടനെതിരെ കേസെടുത്തിരിക്കുന്നത്. പട്ടികജാതി/പട്ടികവര്ഗങ്ങള്ക്കെതിരായ അതിക്രമങ്ങള് തടയാനുള്ള നിയമപ്രകാരമാണ് കേസെടുത്തത്.
കഴിഞ്ഞ ഏപ്രിലിലാണ് കേസിനാസ്പദമായ സംഭവം ഉണ്ടായത്. സൂര്യ നായകനായ റെട്രോ എന്ന ചിത്രത്തിന്റെ പ്രൊമോഷന് പരിപാടിക്കിടെയാണ് നടന്റെ അധിക്ഷേപ പരമാര്ശം നടത്തിയത്. തുടർന്ന് കഴിഞ്ഞ ചൊവ്വാഴ്ച വിജയ് ദേവരകൊണ്ടയ്ക്കെതിരെ ജോയിന്റ് ആക്ഷന് കമ്മിറ്റി ഓഫ് ട്രൈബല് കമ്യൂണിറ്റീസിന്റെ സംസ്ഥാന പ്രസിഡന്റ് നേനാവത് അശോക് കുമാര് നായിക് പോലീസില് പരാതി നല്കുകയായിരുന്നു.
Also Read:ഞാനും അറിഞ്ഞിട്ടുണ്ട് പ്രേത സാന്നിധ്യം – വെളിപ്പെടുത്തലുമായി സോനാക്ഷി സിൻഹ
ജമ്മു കശ്മീരിലെ പഹല്ഗാമില് നടന്ന ഭീകരാക്രമണത്തെ കുറിച്ച് സംസാരിക്കുന്നതിനിടെയാണ് വിജയ് ദേവരകൊണ്ടയുടെ വിവാദ പരാമര്ശം ഉണ്ടായത്. ‘ഭീകരര് 500 വര്ഷം മുമ്പുള്ള ആദിവാസികളെ പോലെ മസ്തിഷ്കമോ സാമാന്യബോധമോ ഉപയോഗിക്കാതെ പോരാടുകയാണ്’ എന്നാണ് നടൻ പറഞ്ഞത്. ആദിവാസികളുടെ വികാരം വ്രണപ്പെടുത്തുന്ന പരാമര്ശമാണ് ഇതെന്ന് നേനാവത് അശോക് കുമാര് പറഞ്ഞു.
To my dear brothers ❤️ pic.twitter.com/QBGQGOjJBL
— Vijay Deverakonda (@TheDeverakonda) May 3, 2025
എന്നാൽ നടന്റെ പരാമർശം വലിയ രീതിയിൽ വിവാദമായതിന് പിന്നാലെ താരം വിശദീകരണവുമായി രംഗത്തെത്തിയിരുന്നു. ഒരു സമുദായത്തേയും വേദനിപ്പിക്കാന് ഉദ്ദേശിച്ചായിരുന്നില്ല തന്റെ പരാമര്ശമെന്നും അവര് രാജ്യത്തിന്റെ അവിഭാജ്യഘടകമാണെന്നും അവരെ താന് ബഹുമാനിക്കുന്നുവെന്നും അദ്ദേഹം എക്സില് കുറിച്ചു.
