Devara Movie Fear Song: ഭയം പതിയിരിക്കുന്ന ഗാനം; ദേവര പാര്ട്ട് 1-ലെ ‘ഫിയര് സോങ്ങ്’ പുറത്ത്
ഗാനത്തിന്റെ തെലുങ്ക്, ഹിന്ദി, തമിഴ് വേര്ഷനുകള് സംഗീതസംവിധായകനായ അനിരുദ്ധ് തന്നെയാണ് ആലപിച്ചിരിക്കുന്നത്.
Devara Part - 1 Fear Song Screen Grab
ജൂനിയർ എൻടിആർ നായകനാകുന്ന കൊരട്ടല ശിവയുടെ ചിത്രം ദേവര പാര്ട്ട് 1-ലെ ആദ്യ ഗാനം പുറത്ത്. അനിരുദ്ധ് സംഗീതം നല്കിയ ഗാനം വിവിധഭാഷകളിലായാണ് പുറത്തിറങ്ങിയത്. തെലുങ്കില് രാമജോഗയ്യ ശാസ്ത്രി, തമിഴില് വിഷ്ണു എടവന്, ഹിന്ദിയില് മനോജ് മുന്തഷിര്, മലയാളത്തില് മങ്കൊമ്പ് ഗോപാലകൃഷ്ണന്, കന്നടയില് വരദരാജ് ചിക്കബല്ലപുര എന്നിവരാണ് ഗാനത്തിന്റെ രചന നിര്വഹിച്ചിരിക്കുന്നത്.
ഗാനത്തിന്റെ തെലുങ്ക്, ഹിന്ദി, തമിഴ് വേര്ഷനുകള് സംഗീതസംവിധായകനായ അനിരുദ്ധ് തന്നെയാണ് ആലപിച്ചിരിക്കുന്നത്. മലയാളം, കന്നഡ വേര്ഷനുകള് ആലപിച്ചിരിക്കുന്നത് സന്തോഷ് വെങ്കിയാണ്.
ആരാധകരുടെ പ്രതീക്ഷ തെറ്റിക്കാത്ത മികച്ചൊരു ഗാനമാണ് ഫിയര് സോങ്ങ് എന്നാണ് സോഷ്യല് മീഡിയ പ്രതികരണങ്ങള് സൂചിപ്പിക്കുന്നത്. വലിയ ബജറ്റില് രണ്ടു ഭാഗങ്ങളായി ഒരുങ്ങുന്ന ചിത്രത്തിന്റെ ഒന്നാം ഭാഗം 2024 ഒക്ടോബര് 10-ന് റിലീസാവും. ചിത്രത്തിന്റെ നേരത്തെ പുറത്തിറങ്ങിയ പോസ്റ്ററുകളും ഗ്ലിംപ്സ് വീഡിയോയും ഏറെ ശ്രദ്ധിക്കപ്പെട്ടിരുന്നു.
കൊരട്ടല ശിവയും എൻടിആറും ജനതാ ഗാരേജിന് ശേഷം ഒരുമിക്കുന്ന ചിത്രത്തില് ബോളിവുഡ് താരങ്ങളായ ജാന്വി കപൂറും സെയ്ഫ് അലി ഖാനും പ്രധാന വേഷങ്ങളില് എത്തുന്നുണ്ട്.
ജാന്വിയുടെ ആദ്യ തെലുങ്ക് ചിത്രം കൂടിയാണ് ദേവരാ. യുവസുധ ആർട്ട്സും എന്ടിആര് ആര്ട്സും ചേർന്ന് നിർമിക്കുന്ന ചിത്രം നന്ദമുരി കല്യാണ് റാം ആണ് അവതരിപ്പിക്കുന്നത്. പ്രകാശ് രാജ്, ശ്രീകാന്ത് മേക്ക, ഷൈന് ടോം ചാക്കോ, നരൈന് തുടങ്ങി ഒട്ടനവധി അഭിനേതാക്കള് ചിത്രത്തിന്റെ ഭാഗമാകുന്നുണ്ട്.
ബിഗ് ബജറ്റില് ഒരുങ്ങുന്ന ചിത്രം തെലുങ്ക്, തമിഴ്, കന്നഡ, ഹിന്ദി, മലയാളം ഭാഷകളിലായി പുറത്തിറങ്ങുമെന്ന് നിര്മ്മാതാക്കള് അറിയിച്ചിരുന്നു. സംഗീത സംവിധാനം: അനിരുദ്ധ്, ഛായാഗ്രഹണം: രത്നവേലു ഐ.എസ്.സി, പ്രൊഡക്ഷന് ഡിസൈനർ: സാബു സിറിള്, എഡിറ്റർ: ശ്രീകര് പ്രസാദ്. പിആര്ഒ: ആതിര ദില്ജിത്ത്
