SP Venkitesh: സംഗീതസംവിധായകൻ എസ്പി വെങ്കിടേഷ് അന്തരിച്ചു; മരണകാരണം ഹൃദയാഘാതം
SP Venkitesh Is Nor More: ചെന്നൈയിലെ വസതിയിൽ വെച്ചായിരുന്നു അന്ത്യം. 80കളുടെ അവസാനത്തും 90കളിലും മലയാള സിനിമയിലെ ഗാനങ്ങളിൽ നിറസാന്നിധ്യമായിരുന്നു എസ് പി വെങ്കടേഷ്. നിരവധി സിനിമകൾക്ക് പശ്ചാത്തലസംഗീതവും എസ്പിവി ഒരുക്കിട്ടുണ്ട്.
എസ്പി വെങ്കിടേഷ്
സംഗീതസംവിധായകൻ എസ്പി വെങ്കിടേഷ് അന്തരിച്ചു. ചെന്നൈയിലെ സ്വവസതിയിൽ വച്ച് ഹൃദയാഘാതം മൂലമാണ് അദ്ദേഹം മരണപ്പെട്ടത്. 70 വയസായിരുന്നു. തമിഴ്നാട്ടിൽ ജനിച്ച അദ്ദേഹം 80കളുടെ അവസാനം മുതൽ 90കളിൽ സൂപ്പർ ഹിറ്റായ പല സിനിമകൾക്കും സംഗീതസംവിധാനം നിർവഹിച്ചിട്ടുണ്ട്. മലയാളത്തിനൊപ്പം തമിഴ്, കന്നഡ, ബംഗാളി, ഹിന്ദി സിനിമകളിലും പ്രവർത്തിച്ചു.
1955 മാർച്ച് അഞ്ചിന് തമിഴ്നാട്ടിലായിരുന്നു എസ്പി വെങ്കിടേഷിൻ്റെ ജനനം. മാൻഡലിൻ വിദ്വാനായ പിതാവിൽ നിന്നാണ് വെങ്കിടേഷ് സംഗീതലോകത്തെത്തുന്നത്. മൂന്ന് വയസ് മുതൽ പിതാവിൻ്റെ ശിക്ഷണത്തിൽ മാൻഡലിൻ വായിക്കാൻ പഠിച്ചു. ഗിറ്റാറിലും ബാഞ്ചോയിലും കഴിവുണ്ടായിരുന്നു. 1968 മുതൽ അദ്ദേഹം മലയാളം ഉൾപ്പെടെ വിവിധ സിനിമകളുടെ ഓർക്കസ്ട്രയിൽ എസ്പി വെങ്കിടേഷ് ഉൾപ്പെട്ടിരുന്നു.
1971ൽ സംഗീത സംവിധായകൻ വിജയഭാസ്കറിനൊപ്പം അദ്ദേഹം സിനിമാജീവിതം ആരംഭിച്ചു. 1975ൽ കന്നഡ സിനിമകളിലൂടെ അസിസ്റ്റൻ്റ് മ്യൂസിക് ഡയറക്ടറായി. 1981ലെ പ്രേമയുദ്ധ എന്ന തെലുങ്ക് ചിത്രമായിരുന്നു സ്വതന്ത്ര സംഗീതസംവിധായകനെന്ന നിലയിൽ അദ്ദേഹത്തിൻ്റെ ആദ്യ സിനിമ. 1985ൽ ജനകീയ കോടതി എന്ന സിനിമയിലൂടെ എസ്പി വെങ്കിടേഷ് മലയാളത്തിൽ അരങ്ങേറി. 150ലധികം മലയാള സിനിമകൾ ഉൾപ്പെടെ 500ലേറെ സിനിമകളുടെ സംഗീതസംവിധാനം നിർവഹിച്ചു.
കുട്ടേട്ടൻ, കിലുക്കം, ഇന്ദ്രജാലം, ജോണി വാക്കർ, സ്ഫടികം, ധ്രുവം, കൗരവർ, രാജാവിൻ്റെ മകൻ തുടങ്ങി നിരവധി മികച്ച ആൽബങ്ങൾ അദ്ദേഹത്തിൻ്റെ സംഗീതസംവിധാനത്തിൽ പുറത്തിറങ്ങിയതാണ്. പല ഹിറ്റ് സിനിമകളുടെ പശ്ചാത്തലസംഗീതവും അദ്ദേഹം നിർവഹിച്ചു. ഇക്കൊല്ലം പുറത്തിറങ്ങിയ വെള്ളേപ്പം എന്ന സിനിമയിലാണ് അദ്ദേഹം അവസാനം പ്രവർത്തിച്ചത്.
