Viral News: ഒരു വര്ഷത്തില് പ്രവര്ത്തിക്കുന്നത് 15 ദിവസം മാത്രം, ഇന്ത്യയില് ഇങ്ങനെയുമുണ്ട് ഒരു റെയില്വേ സ്റ്റേഷന്
Anugrah Narayan Road Ghat Railway Station: പുണ്യനദിയായി കരുതുന്ന പുന്പുണില് ആചാരങ്ങള് നിര്വഹിക്കാനെത്തുന്ന നിരവധി തീര്ത്ഥാടകര് ഈ റെയില്വേ സ്റ്റേഷനിലെത്തുന്നുണ്ട്. അതുകൊണ്ട് പിതൃപക്ഷ കാലയളവില് ഇവിടെ ട്രെയിനുകള് നിര്ത്തും
അനുഗ്രഹ് നാരായൺ റോഡ് ഘട്ട്
ഏഴായിരത്തിലേറെ റെയില്വേ സ്റ്റേഷനുകള് നമ്മുടെ രാജ്യത്തുണ്ട്. എന്നാല് അവയ്ക്കൊന്നും ഇല്ലാത്ത ഒരു പ്രത്യേക ബിഹാറിലെ അനുഗ്രഹ് നാരായൺ റോഡ് ഘട്ട് സ്റ്റേഷനുണ്ട്. ഒരു വര്ഷത്തില് വെറും 15 ദിവസം മാത്രമാണ് ഈ റെയില്വേ സ്റ്റേഷന് പ്രവര്ത്തിക്കുന്നത്. ഹൈന്ദവ വിശ്വാസപ്രകാരമുള്ള പിതൃപക്ഷ കാലയളവില് മാത്രമാണ് ഈ റെയില്വേ സ്റ്റേഷന് പ്രവര്ത്തിക്കുന്നത്. കേരളത്തില് അത്ര പ്രചാരമില്ലെങ്കിലും, മറ്റ് പല സംസ്ഥാനങ്ങളിലും വിശ്വാസികള്ക്ക് വളരെ പ്രധാനപ്പെട്ടതാണ് പിതൃപക്ഷം. പിതൃപ്രീതി നേടുന്നതിനും, കുടുംബത്തിന്റെ ഐശ്വര്യത്തിനും പിതൃപക്ഷത്തില് വിശ്വാസികള് പ്രാര്ത്ഥനയില് മുഴുകും.
പുണ്യനദിയായി കരുതുന്ന പുന്പുണില് ആചാരങ്ങള് നിര്വഹിക്കാനെത്തുന്ന നിരവധി തീര്ത്ഥാടകര് ഈ റെയില്വേ സ്റ്റേഷനിലെത്തുന്നുണ്ട്. അതുകൊണ്ട് പിതൃപക്ഷ കാലയളവില് ഇവിടെ ട്രെയിനുകള് നിര്ത്തും. ഇത്തവണത്തെ പിതൃപക്ഷം സെപ്തബര് ഏഴിന് ആരംഭിച്ചു. അതുകൊണ്ട് തന്നെ ഇതുവരെ വിജനമായിരുന്ന ഈ റെയില്വേ സ്റ്റേഷനില് ഇപ്പോള് ഭയങ്കര തിരക്കാണ്.
രാജ്യത്തിന്റെ വിവിധ ഭാഗങ്ങളില് നിന്നുള്ള തീര്ത്ഥാടകര് ഇവിടെ പിണ്ഡസമര്പ്പണ ചടങ്ങിന് എത്താറുണ്ട്. ഈ മാസം 21 വരെ ഇവിടെ ട്രെയിനുകള് നിര്ത്തുമെന്നാണ് റിപ്പോര്ട്ട്. ഈ റെയില്വേ സ്റ്റേഷനില് ടിക്കറ്റ് കൗണ്ടറില്ലെന്നതാണ് മറ്റൊരു പ്രത്യേകത. അതുകൊണ്ട് ഗയ സ്റ്റേഷന് വരെ ആളുകള്ക്ക് ടിക്കറ്റ് എടുക്കേണ്ടി വരുന്നു. വല്ലപ്പോഴും മാത്രം പ്രവര്ത്തിക്കുന്നതിനാല് ഈ റെയില്വേ സ്റ്റേഷനില് തകരാറുകളുമുണ്ടെന്നാണ് റിപ്പോര്ട്ട്.
