Chennai Metro: മെട്രോ സൗകര്യം എളുപ്പത്തിൽ, കോടമ്പാക്കം പവർ ഹൗസ് – പനഗൽ പാർക്ക് പാത ഉടനെത്തും
Chennai Metro Phase 2: ചെന്നൈയുടെ ഒരു അറ്റത്ത് നിന്ന് മറ്റേ അറ്റത്തേക്ക് പോകുന്നവരുടെ യാത്രാ സമയം ഇത് ഗണ്യമായി കുറയ്ക്കുന്നതാണ്. നിലവിൽ പൂനമല്ലി - പോരൂർ - വടപളനി പാത പ്രവർത്തനക്ഷമമാക്കുന്നതിനുള്ള അവസാനഘട്ട ഒരുക്കങ്ങളിലാണ് മെട്രോ അധികൃതർ. ഇതിന് പിന്നാലെയാണ് പനഗൽ പാർക്ക് വരെയുള്ള ഭാഗം പ്രാധാന്യത്തോടെ പൂർത്തിയാക്കുന്നത്.
ചെന്നൈ മെട്രോ
ചെന്നൈ നഗരത്തിലെ ഗതാഗത കുരുക്ക് പരിഹരിക്കുന്നതിൽ ചെന്നൈ മെട്രോ നിർണായക പങ്ക് വഹിക്കുന്നുണ്ട്. വിദ്യാർത്ഥികൾക്കും തൊഴിലാളികൾക്കും പ്രത്യേകിച്ച് ഐടി ജീവനക്കാർക്കും ചെന്നൈ മെട്രോ ഉപകാരിയാണ്. പ്രധാനമായും രണ്ട് പാതകളിലാണ് ചെന്നൈ മെട്രോ നിലവിൽ പ്രവർത്തിക്കുന്നത്. ബ്ലൂ ലൈൻ വിംകോ നഗർ ഡിപ്പോ മുതൽ ചെന്നൈ എയർപോർട്ട് വരെ വരെയും ഗ്രീൻ ലൈൻ ചെന്നൈ സെൻട്രൽ മുതൽ സെന്റ് തോമസ് മൗണ്ട് വരെയും.
അതേസമയം രണ്ടാം ഘട്ടത്തിന്റെ പ്രവർത്തനങ്ങളും പുരോഗമിക്കുന്നുണ്ട്. മൂന്ന് പുതിയ പാതകളാണ് രണ്ടാം ഘട്ടത്തിൽ ഉൾപ്പെടുന്നത്. ഇപ്പോഴിതാ, രണ്ടാം ഘട്ടത്തിന്റെ ഭാഗമായി, കോടമ്പാക്കം പവർ ഹൗസ് മുതൽ പനഗൽ പാർക്ക് വരെയുള്ള പാതയുടെ പ്രവർത്തനങ്ങൾ ഉടൻ പൂർത്തിയായേക്കുമെന്നാണ് റിപ്പോർട്ടുകൾ. ജൂലൈയിൽ ഈ റൂട്ടിൽ ട്രാക്കുകൾ സ്ഥാപിക്കാൻ മെട്രോ റെയിൽ കോർപ്പറേഷൻ പദ്ധതിയിടുന്നുണ്ട്.
കോടമ്പാക്കം പവർ ഹൗസ് മുതൽ പനഗൽ പാർക്ക് വരെ 2.9 കിലോമീറ്റർ നീളത്തിലാണ് ഈ പാതയുള്ളത്. ഇരുവശത്തുമായി ആകെ 5.8 കിലോമീറ്റർ ട്രാക്കുകൾ സ്ഥാപിക്കേണ്ടതുണ്ട്. പാതയുടെ നിർമ്മാണം വേഗത്തിലാക്കി അടുത്ത വർഷം ആദ്യത്തോടെ പൂർത്തിയാക്കാനാണ് മെട്രോ റെയിൽ ലിമിറ്റഡ് ലക്ഷ്യമിടുന്നത്.
ALSO READ: മെട്രോ യാത്രക്കാർ ശ്രദ്ധിക്കുക, പഴയ ട്രാവൽ കാർഡുകൾ ഇനിയില്ല, പകരം ആ ഒരു കാർഡ് മാത്രം!
നിലവിൽ, പൂനമല്ലി – പോരൂർ – വടപളനി എന്നിവയ്ക്കിടയിലുള്ള എലിവേറ്റഡ് ലൈൻ ആദ്യം പ്രവർത്തനമാരംഭിക്കുക എന്നതാണ് മെട്രോ റെയിൽ കോർപ്പറേഷന്റെ പ്രാഥമിക ലക്ഷ്യം. 2027 മാർച്ചോടെ ഈ പാത പനഗൽ പാർക്ക് വരെ നീട്ടാൻ അധികൃതർ ലക്ഷ്യം വച്ചിട്ടുണ്ട്.
പനഗൽ പാർക്ക്: ആദ്യത്തെ സബ്വേ സ്റ്റേഷൻ
പൂനമല്ലിയിൽ നിന്നുള്ള എലിവേറ്റഡ് മെട്രോ ലൈൻ ആദ്യമായി പനഗൽ പാർക്കിൽ ഭൂഗർഭ പാതയിലേക്ക് പ്രവേശിക്കുമെന്നതാണ് ഈ പദ്ധതിയുടെ ഏറ്റവും പ്രധാനപ്പെട്ട സവിശേഷത. പദ്ധതിയുടെ രണ്ടാം ഘട്ടത്തിൽ യാത്രക്കാർ ഉപയോഗിക്കുന്ന ആദ്യത്തെ ഭൂഗർഭ സ്റ്റേഷനായിരിക്കും പനഗൽ പാർക്ക്. മൂന്ന് സ്റ്റേഷനുകൾ മാത്രമേ ഉള്ളൂവെങ്കിലും, സാങ്കേതികമായി ഇത് വളരെ വെല്ലുവിളി നിറഞ്ഞ ഒരു ഭാഗമാണിത്. ട്രാക്ക് നിർമ്മാണ പ്രവർത്തനങ്ങളോടൊപ്പം, ട്രെയിനുകൾക്ക് വൈദ്യുതി എത്തിക്കുന്നതിന് ഓവർഹെഡ് ഇലക്ട്രിക് വയറുകൾ സ്ഥാപിക്കുന്ന ജോലിയും നടക്കുന്നതാണ്.
യാത്രക്കാർക്ക് സന്തോഷിക്കാം
ഈ പാത പ്രവർത്തനം ആരംഭിക്കുന്നതോടെ മെട്രോ സൗകര്യം കൂടുതൽ എളുപ്പത്തിലാകും. ടി. നഗറിലും പരിസര പ്രദേശങ്ങളിലും താമസിക്കുന്ന ആളുകൾക്ക് വളരെയധികം പ്രയോജനം ലഭിക്കുമെന്നും അധികൃതർ പറയുന്നു. പനഗൽ പാർക്ക് സ്റ്റേഷൻ കമ്മീഷൻ ചെയ്യുന്നതോടെ, യാത്രക്കാർക്ക് രണ്ടാം ഘട്ട മെട്രോ ലൈനിൽ നിന്ന് ഒന്നാം ഘട്ട നെറ്റ്വർക്കിലേക്ക് എളുപ്പത്തിൽ കണക്റ്റുചെയ്യാൻ കഴിയും. ചെന്നൈയുടെ ഒരു അറ്റത്ത് നിന്ന് മറ്റേ അറ്റത്തേക്ക് പോകുന്നവരുടെ യാത്രാ സമയം ഇത് ഗണ്യമായി കുറയ്ക്കുന്നതാണ്. നിലവിൽ പൂനമല്ലി – പോരൂർ – വടപളനി പാത പ്രവർത്തനക്ഷമമാക്കുന്നതിനുള്ള അവസാനഘട്ട ഒരുക്കങ്ങളിലാണ് മെട്രോ അധികൃതർ.
