Chennai Metro: ചെന്നൈ മെട്രോയിൽ ഇനി വനിതകൾ കൂടുതൽ സുരക്ഷിതർ, പുതിയ നടപടി ഇതാ

ചെന്നൈ: മെട്രോ ട്രെയിനുകളിലും സ്റ്റേഷനുകളിലും വനിതാ യാത്രക്കാരുടെ സുരക്ഷ ഉറപ്പാക്കുന്നതിനായി ചെന്നൈ മെട്രോ റെയിൽ ലിമിറ്റഡ് (CMRL) ‘പിങ്ക് സ്‌ക്വാഡ്’ വിപുലീകരിക്കുന്നു. പദ്ധതിയുടെ ഭാഗമായി കൂടുതൽ വനിതാ ഉദ്യോഗസ്ഥരെ നിയമിക്കുന്നതിനായി നാല് വർഷത്തെ കരാർ അടിസ്ഥാനത്തിൽ ഏജൻസികളിൽ നിന്ന് CMRL ടെൻഡർ ക്ഷണിച്ചു.

പ്രധാന മാറ്റങ്ങൾ

രണ്ട് പ്രധാന കോറിഡോറുകളിലെയും സ്റ്റേഷനുകളിൽ പിങ്ക് സ്‌ക്വാഡിന്റെ സാന്നിധ്യം വർദ്ധിപ്പിക്കും. ആയോധന കലകളിൽ വൈദഗ്ധ്യമുള്ള വനിതാ ഉദ്യോഗസ്ഥരെയാണ് പ്രധാനമായും സ്‌ക്വാഡിൽ ഉൾപ്പെടുത്തുന്നത്. മെട്രോ സ്റ്റേഷനുകൾക്ക് പുറമെ CMRL ഡിപ്പോ അഡ്മിനിസ്‌ട്രേറ്റീവ് ഓഫീസ്, ചെന്നൈ മെട്രോ അഡ്മിനിസ്‌ട്രേറ്റീവ് ഓഫീസ് എന്നിവിടങ്ങളിലേക്കും സേവനം വ്യാപിപ്പിക്കും.

Also Read: Delhi Duronto Express: ഡല്‍ഹിക്ക് പോകാനിതാ തുരന്തോ എക്‌സ്പ്രസ്; ഈ ദിവസം യാത്ര പുറപ്പെടാം

കോറിഡോർ 1 ൽ ഗിണ്ടി, സൈദാപേട്ട്, നന്ദനം, എജി-ഡിഎംഎസ്, ഹൈക്കോടതി, വാഷർമെൻപേട്ട്, വിംകോ നഗർ തുടങ്ങി 21 സ്റ്റേഷനുകളിലാണ് സ്‌ക്വാഡിനെ വിന്യസിക്കുന്നത്. കോറിഡോർ 2ൽ എയർപോർട്ട്, ആലന്തൂർ, വടപളനി, കോയമ്പേട്, എഗ്മോർ, സെൻട്രൽ സ്റ്റേഷൻ ഉൾപ്പെടെയുള്ള പ്രധാന കേന്ദ്രങ്ങളിലും സ്ക്വാഡ് ഉണ്ടാകും.

പദ്ധതിയുടെ പശ്ചാത്തലം

2023 ജൂണിൽ ഒരു ദ്രുത പ്രതികരണ ടീം എന്ന നിലയിലാണ് പിങ്ക് സ്‌ക്വാഡ് എന്ന ആശയം രൂപപ്പെട്ടത്. 12,000 വനിതാ യാത്രക്കാർക്കിടയിൽ നടത്തിയ സുരക്ഷാ സർവേയ്ക്ക് ശേഷം 2024 ഫെബ്രുവരിയിൽ പദ്ധതി ഔദ്യോഗികമായി ആരംഭിച്ചു. ആദ്യ ഘട്ടത്തിൽ 23 വനിതാ ഉദ്യോഗസ്ഥരെയാണ് നിയമിച്ചിരുന്നത്. യാത്രികരുടെ നിരന്തരമായ അഭ്യർത്ഥനയും തിരക്ക് വർദ്ധിക്കുന്ന സാഹചര്യവും പരിഗണിച്ചാണ് ഇപ്പോൾ അംഗബലം കൂട്ടാൻ തീരുമാനിച്ചിരിക്കുന്നത്.

സ്ത്രീകൾക്കെതിരെയുള്ള അതിക്രമങ്ങൾ തടയുന്നതിനും യാത്രക്കാർക്ക് കൂടുതൽ ആത്മവിശ്വാസം നൽകുന്നതിനും ഈ നീക്കം സഹായിക്കുമെന്ന് CMRL അധികൃതർ വ്യക്തമാക്കി.