Omar Abdulla in Jammu: അതിർത്തി സംഘർഷം; മുഖ്യമന്ത്രി ഒമർ അബ്ദുള്ള ജമ്മുവിലേക്ക്, സ്ഥിതിഗതികൾ വിലയിരുത്തും

CM Omar Abdulla

ശ്രീന​ഗർ: അതിർത്തിയിൽ സംഘർഷം രൂക്ഷമായികൊണ്ടിരിക്കുന്ന സാഹചര്യത്തിൽ മുഖ്യമന്ത്രി ഒമർ അബ്ദുള്ള ജമ്മുവിലേക്ക്. പാക് ഡ്രോൺ ആക്രമണത്തെ തുടർന്നുണ്ടായ സ്ഥിതിഗതികൾ വിലയിരുത്തുന്നതിനായാണ് അദ്ദേഹം യുദ്ധഭൂമിയിലേക്ക് പോകുന്നത്. അതിർത്തി കടന്നുള്ള ആക്രമണം ശക്തമാക്കിയിരിക്കുകയാണ് പാകിസ്ഥാൻ. എന്നാൽ പാക് പ്രകോപനത്തിന് കനത്ത തിരിച്ചടിയാണ് ഇന്ത്യയുടെ ഭാ​ഗത്ത് നിന്ന് ലഭിക്കുന്നത്. അതിനിടെ അതിർത്തിയിലുണ്ടായ നുഴഞ്ഞുകയറ്റ ശ്രമം സുരക്ഷാ സേന പരാജയപ്പെടുത്തി.

ജമ്മുവിൽ പുലർച്ചെ വീണ്ടും പാകിസ്ഥാൻ്റെ ഭാ​ഗത്ത് നിന്ന് പ്രകോപനമുണ്ടായതായി റിപ്പോർട്ടുണ്ടായിരുന്നു. സംഭവത്തിൽ ജമ്മു ന​ഗരങ്ങളെ ലക്ഷ്യംവച്ചു വന്ന പാക് ഡ്രോണുകൾ ഇന്ത്യൻ സൈന്യം തകർത്തു. പുലർച്ചെ നാല് മണിക്ക് ശേഷമാണ് ആക്രമണം നടന്നത്. പാക് ഡ്രോണുകളെ ഇന്ത്യൻ സൈന്യം കൃത്യമായി നിർവീര്യമാക്കിയതായി അധികൃതർ അറിയിച്ചു.

അതേസമയം ഇന്ത്യ-പാകിസ്ഥാൻ സംഘർഷം രൂക്ഷമാകുന്ന സാഹചര്യത്തിൽ പ്രധാന വിമാനത്താവളങ്ങൾ‌ അടച്ചിട്ടു. ഇതുവരെ 24 വിമാനത്താവളങ്ങളാണ് സാധാരണ വിമാന സർവീസുകൾക്കായി അടച്ചിട്ടിരിക്കുന്നത്. ജമ്മു, പഞ്ചാബ്, ഗുജറാത്ത്, രാജസ്ഥാൻ എന്നിവിടങ്ങളിൽ പാകിസ്ഥാൻ ഡ്രോൺ, മിസൈൽ ആക്രമണത്തെത്തുടർന്നാണ് ഈ നടപടിയെന്നും വ്യോമയാന മന്ത്രാലയം അറിയിച്ചു.

കഴിഞ്ഞ ദിവസം ജമ്മു, പഞ്ചാബ്, രാജസ്ഥാൻ എന്നിവിടങ്ങളിലെ പ്രദേശങ്ങളെ ലക്ഷ്യമാക്കി പാകിസ്ഥാൻ ഡ്രോൺ, മിസൈൽ ആക്രമണം നടത്തിയിരുന്നു. ആക്രമണത്തിന് ശക്തമായ തിരിച്ചടിയാണ് ഇന്ത്യ നൽകിയത്.