ആഗോള ചിപ്പ് വിപണി പിടിച്ചടക്കാൻ ഇന്ത്യ; 1.27 ലക്ഷം കോടിയുടെ ‘സെമികോൺ 2.0’ പദ്ധതിക്ക് അംഗീകാരം!

Narendra Modi

ന്യൂഡല്‍ഹി: ഇന്ത്യയുടെ സെമികണ്ടക്ടർ യാത്ര കൂടുതൽ ഊർജ്ജസ്വലമാകുന്നുവെന്ന് പ്രധാനമന്ത്രി നരേന്ദ്ര മോദി. കേന്ദ്ര മന്ത്രിസഭ സെമികോൺ 2.0 പദ്ധതിക്ക് അംഗീകാരം നൽകിയതിന് പിന്നാലെ എക്‌സില്‍ പങ്കുവെച്ച കുറിപ്പിലാണ് മോദി പദ്ധതിയെ പ്രശംസിച്ചത്. 1,27,500 കോടി രൂപയുടെ സാമ്പത്തിക അനുമതിയോടെ ‘സെമികോൺ 2.0’ പദ്ധതിക്ക് കേന്ദ്ര മന്ത്രിസഭ അംഗീകാരം നൽകിയതായി അദ്ദേഹം അറിയിച്ചു. ഇന്ത്യയെ സെമികണ്ടക്ടർ ഡിസൈൻ, നിർമ്മാണം, നവീകരണം എന്നിവയുടെ ആഗോള കേന്ദ്രമാക്കി മാറ്റാനുള്ള രാജ്യത്തിന്റെ പ്രതിജ്ഞാബദ്ധത വീണ്ടും തെളിയിക്കുന്നതാണ് ഈ തീരുമാനമെന്നും അദ്ദേഹം വ്യക്തമാക്കി.

ഈ പദ്ധതി വഴി കൂടുതൽ വിദേശ നിക്ഷേപങ്ങൾ ആകർഷിക്കാനും, യുവജനങ്ങള്‍ക്ക്‌ ഉയർന്ന മൂല്യമുള്ള തൊഴിലവസരങ്ങൾ സൃഷ്ടിക്കാനും, വിതരണ ശൃംഖലകൾ ശക്തിപ്പെടുത്താനും, നിർണായക മേഖലകളിൽ സാങ്കേതിക സ്വയംപര്യാപ്തത കൈവരിക്കാനും ഇന്ത്യയ്ക്ക് സാധിക്കുമെന്നും പ്രധാനമന്ത്രി കൂട്ടിച്ചേർത്തു.

സെമികോൺ 2.0 പദ്ധതി

പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗമാണ് ഇന്ത്യയിലെ സെമികണ്ടക്ടർ ഡിസൈൻ, ഉത്പാദന ആവാസവ്യവസ്ഥ എന്നിവയുടെ വികസനത്തിനായി 1,27,500 കോടി രൂപയുടെ തുക അനുവദിച്ചത്.

ഇന്ത്യയിൽ ഈ മേഖലയ്ക്ക് നിരന്തരവും ദീർഘകാലവുമായ പിന്തുണ ആവശ്യമാണെന്ന് തിരിച്ചറിഞ്ഞുകൊണ്ടും, ‘സെമികോൺ 1.0’ പദ്ധതിയിലൂടെ കൈവരിച്ച മികച്ച മുന്നേറ്റങ്ങളെ കൂടുതൽ മുന്നോട്ട് കൊണ്ടുപോകുന്നതിനുമാണ് ലക്ഷ്യമിടുന്നത്.

Also Read: Narendra Modi: ഇക്കാത്ത് മുതല്‍ കോഫി ബോക്‌സ് വരെ; വിദേശ സന്ദര്‍ശനത്തില്‍ മോദി നല്‍കിയ സമ്മാനങ്ങള്‍

സെമികണ്ടക്ടർ മേഖലയെ സമഗ്രമായി വളർത്തിയെടുക്കുന്നതിനായി ആറ് പ്രധാന ഘട്ടങ്ങളെ അടിസ്ഥാനമാക്കിയാണ് സെമികോൺ 2.0 വിഭാവനം ചെയ്തിരിക്കുന്നത്. ചിപ്പ് ഡിസൈൻ ആണ് ആദ്യഘട്ടം. ആദ്യ ഘട്ടത്തിൽ ചിപ്പ് ഡിസൈൻ രംഗത്തുണ്ടായ വിജയങ്ങളെ അടിസ്ഥാനമാക്കിയായിരിക്കും ഇതിന്റെ പ്രവർത്തനം. ഇതിനകം തന്നെ 105 സ്റ്റാർട്ടപ്പുകൾ സ്വന്തമായി ചിപ്പുകൾ വികസിപ്പിക്കാൻ ആരംഭിച്ചിട്ടുണ്ട്. ഇനി ചിപ്പ് ഡിസൈൻ സംവിധാനങ്ങളെ കൂടുതൽ ആഴത്തിൽ വളർത്തിയെടുക്കുന്നതിലായിരിക്കും ശ്രദ്ധ കേന്ദ്രീകരിക്കുക.

സെമികോൺ 2.0-ന് കീഴിൽ സ്വന്തമായി ഐപി, ചിപ്പുകളുടെയും സിസ്റ്റങ്ങളുടെയും ഡിസൈനുകൾ എന്നിവ വികസിപ്പിക്കുകയാണ് ലക്ഷ്യം. ഈ പ്രവർത്തനങ്ങൾ സെമികണ്ടക്ടർ ചിപ്പ് ഡിസൈൻ ഐപി രംഗത്ത് ഇന്ത്യയെ ലോകത്തെ ഒരു പ്രധാന രാജ്യമാക്കി മാറ്റും.

മോദിയുടെ ട്വീറ്റ്:

India’s semiconductor journey gets even more vibrant!

The Cabinet has approved Semicon 2.0 with an outlay of Rs. 1,27,500 crore, reaffirming our long-term commitment to making India a global centre for semiconductor design, manufacturing and innovation. Powered by our youth,…

— Narendra Modi (@narendramodi) July 15, 2026

സെമികണ്ടക്ടർ നിർമ്മാണത്തിനാവശ്യമായ ‘യന്ത്രങ്ങളും അസംസ്കൃത വസ്തുക്കളും’ ആഭ്യന്തരമായി വികസിപ്പിക്കുക എന്നതാണ് രണ്ടാം ഘട്ടം. ചിപ്പ് നിർമ്മാണത്തിനും ഗവേഷണത്തിനും ആവശ്യമായ യന്ത്രങ്ങൾ നിർമ്മിക്കുന്ന കമ്പനികൾക്കും, അതിന് അത്യാവശ്യമായ രാസവസ്തുക്കൾ, വാതകങ്ങൾ, മറ്റ് വസ്തുക്കൾ എന്നിവ ഉത്പാദിപ്പിക്കുന്ന കമ്പനികൾക്കും ഈ പദ്ധതിയിലൂടെ സാമ്പത്തിക ആനുകൂല്യങ്ങൾ നൽകും.

കൂടുതൽ ചിപ്പ് നിർമ്മാണ ശാലകൾ അഥവാ ‘ഫാബുകൾ’ സ്ഥാപിക്കുക എന്നതാണ് മൂന്നാം ഘട്ടം. ഇന്ത്യയിലെ ആദ്യത്തെ കമേഴ്സ്യൽ ചിപ്പ് ഫാബ് 2028-ഓടെ പ്രവർത്തനം ആരംഭിക്കാൻ നിശ്ചയിച്ചിട്ടുള്ള പശ്ചാത്തലത്തിൽ, ഇന്ത്യയുടെ സെമികണ്ടക്ടർ തന്ത്രങ്ങളിൽ ആഗോളതലത്തിൽ വലിയ ആത്മവിശ്വാസമാണ് പ്രകടമാകുന്നത്. കൂടുതൽ ആഗോള നിർമ്മാതാക്കളെ ഇന്ത്യയിലേക്ക് ആകർഷിക്കാനും ഇവിടെ ഫാബുകൾ സ്ഥാപിക്കാനും വിപുലമായ ശ്രമങ്ങൾ നടത്തും.

English Summary

The Indian Cabinet has approved the Semicon 2.0 project with an outlay of Rs 1,27,500 crore. This mega initiative aims to make India a global hub for semiconductor design and manufacturing. The comprehensive policy is built upon six key strategic pillars to grow the tech ecosystem. It follows the successful approval of twelve manufacturing units under the earlier ISM 1.0 phase.