Balachandran Vadakkedath: പ്രഭാഷകൻ, രാഷ്ട്രീയ- സാമൂഹ്യപ്രവർത്തകൻ; എഴുത്തുകാരൻ ബാലചന്ദ്രന്‍ വടക്കേടത്ത് അന്തരിച്ചു

Image Credits: Social Media

തൃശൂർ: സാഹിത്യ നിരൂപകനും എഴുത്തുകാരനും പ്രഭാഷകനുമായ ബാലചന്ദ്രൻ വടക്കേടത്ത് അന്തരിച്ചു. 69 വയസ്സായിരുന്നു. ഏറെ നാളായി വാർധക്യസഹജമായ അസുഖങ്ങളെ തുടർന്ന് ചികിത്സയിലായിരുന്നു. തൃശൂരിലെ സ്വകാര്യ ആശുപത്രിയിലായിരുന്നു അന്ത്യം. കേരള കലാമണ്ഡലം സെക്രട്ടറി, സാഹിത്യ അക്കാദമി വൈസ് പ്രസിഡന്റ് എന്നീ ചുമതലകൾ വഹിച്ചിട്ടുണ്ട്.

മുമ്പ് ക്ന്ദ്ര സാഹിത്യ അക്കാദമി ജനറൽ കൗൺസിൽ അംഗമായിരുന്നു. സമസ്ത കേരള സാഹിത്യ പരിഷത്ത് വൈസ് പ്രസിഡന്റ് ആയിരിക്കെയാണ് അന്ത്യം. ആരോ​ഗ്യ വകുപ്പ് ഉദ്യോ​ഗസ്ഥനായിരുന്നു. നാളെ ഒക്ടോബർ 20-ന് രാവിലെ 10 മണിക്ക് തൃപ്രയാറിലെ വീട്ടുവളപ്പിലാണ് സംസ്കാരം. ഇന്ന് രാവിലെ 11.30 ന് മൃതദേഹം കേരള സാഹിത്യ അക്കാദമിയിൽ പൊതുദർശനത്തിനായി എത്തിക്കും.

പ്രഭാഷകനായും രാഷ്ട്രീയക്കാരനായും പൊതുരം​ഗത്ത് തിളങ്ങിയ ബാലചന്ദ്രൻ വടക്കേടത്ത് നിരവധി നിരൂപണഗ്രന്ഥങ്ങളുടെ രചയിതാവാണ്. വിശ്വമലയാള മഹോത്സവത്തിന്റെ സംഘാടനവുമായി ബന്ധപ്പെട്ട വിവാദങ്ങളെ തുടർന്ന് 2012 ഡിസംബറിൽ കേരള സാഹിത്യ അക്കാഡമി വൈസ് പ്രസിഡന്റ് സ്ഥാനത്ത് നിന്ന് ഇദ്ദേ​ഹത്തെ നീക്കിയത് വിവാദമായിരുന്നു. ചുമതലയിൽ നിന്ന് നീക്കിയതിനെ തുടർന്ന് അക്കാദമി മുറ്റത്ത് വടക്കേടത്ത് ഒറ്റക്കിരുന്ന് പ്രതിഷേധിച്ചതും വാർത്തയായിരുന്നു. 1955-ൽ എഴുത്തുകാരനായ രാമചന്ദ്രൻ വടക്കേടത്തിന്റേയും സരസ്വതിയുടേയും മകനായി നാട്ടികയിലാണ് ജനനം.

വിമർശകന്റെ കാഴ്ചകൾ, കൂട്ടിവായന, ആധുനികതയ്ക്കും ഉത്തരാധുനികതയ്ക്കും ഇടയിൽ, സച്ചിൻ അടിച്ച പന്ത്, ആശയം സമൂഹം ഇടതുപക്ഷം, ആനന്ദമീമാംസ, നോവൽ സന്ദർശനങ്ങൾ, പ്രത്യവമർശം,വാക്കിന്റെ സൗന്ദര്യശാസ്ത്രം, നിഷേധത്തിന്റെ കല, മരണവും സൗന്ദര്യവും, ഉത്തരസംവേദനം, വായനയുടെ ഉപനിഷത്ത്, പുതിയ ഇടതുപക്ഷം, പുരോഗമനപാഠങ്ങൾ, രമണൻ എങ്ങനെ വായിക്കരുത്, ജന്മശ്രാദ്ധം, ഒരു ചോദ്യം രണ്ടുത്തരം, അർത്ഥങ്ങളുടെ കലഹം, ചെറുത്തുനിൽപ്പിന്റെ ദേശങ്ങൾ എന്നി പുസ്തകളുടെ രചയിതാവാണ്.

എ.ആർ. രാജരാജവർമ്മ പുരസ്‌കാരം, കുറ്റിപ്പുഴ അവാർഡ്, ഫാ. അബ്രഹാം വടക്കേൽ അവാർഡ്, കാവ്യമണ്ഡലം അവാർഡ്, ഗുരുദർശന അവാർഡ്, ശ്രീശൈലം സാഹിത്യ പുരസ്‌കാരം, സി.പി. മേനോൻ അവാർഡ്, കലാമണ്ഡലം മുകുന്ദരാജാ പുരസ്‌കാരം തുടങ്ങി നിരവധി അവാർഡുകൾ സ്വന്തമാക്കിയിട്ടുണ്ട്.