Kerala Weather Update: സംസ്ഥാനത്ത് ഇന്ന് മഴ കടുക്കും; നാല് ജില്ലകളിൽ യെല്ലോ അലർട്ട്

പ്രതീകാത്മക ചിത്രം

സംസ്ഥാനത്ത് ഇന്ന് മഴ കടുക്കുമെന്ന് കേന്ദ്ര കാലാവസ്ഥാ വകുപ്പ്. നാല് ജില്ലകളിൽ ശക്തമായ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പ് അറിയിച്ചത്. വയനാട്, മലപ്പുറം, ഇടുക്കി, പത്തനംതിട്ട ജില്ലകളിൽ യെല്ലോ അലർട്ട് പ്രഖ്യാപിച്ചിരിക്കുകയാണ്. രാവിലെ മലപ്പുറം, വയനാട് ജില്ലകളിലാണ് യെല്ലോ അലർട്ട് പ്രഖ്യാപിച്ചിരുന്നത്.

വരും മണിക്കൂറുകളിൽ സംസ്ഥാനത്തിൻ്റെ വിവിധയിടങ്ങളിൽ ഒറ്റപ്പെട സ്ഥലത്ത് കനത്ത മഴസാധ്യതയുണ്ടെന്നാണ് കാലാവസ്ഥാ വകുപ്പിൻ്റെ പ്രവചനം. എറണാകുളം ജില്ലയുടെ വിവിധ ഭാഗങ്ങൾ മേഘാവൃതമാണ്. ഇവിടെയടക്കം മഴസാധ്യത നിലനിൽക്കുകയാണ്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ ലഴിക്കുന്ന മഴയാണ് യെല്ലോ അലർട്ടിൽ വരുന്നത്.

Also Read: Kerala Weather Update: ഇന്ന് കൂടുതൽ ജില്ലകളിൽ മഴ; വടക്കൻ ജില്ലകൾക്ക് ആശ്വസിക്കാം; കാലാവസ്ഥ മുന്നറിയിപ്പ്‌

കേരള തീരത്ത് ഈ മാസം 12നും ലക്ഷദ്വീപ് തീരത്ത് ഈ മാസം 12, 13 തീയതികളും മത്സ്യബന്ധനത്തിന് വിലക്കുണ്ട്. കേരള തീരത്തിനൊപ്പം തെക്കൻ തമിഴ്നാട് തീരം, കന്യാകുമാരി പ്രദേശം, ഗൾഫ് ഓഫ് മന്നാർ, മാലിദ്വീപ് എന്നിവിടങ്ങളിലും ഇന്ന് ജാഗ്രതാനിർദ്ദേശം പുറപ്പെടുവിച്ചിട്ടുണ്ട്. ഇന്ന് വൈകിട്ട് 5.30 വരെ കന്യാകുമാരി തീരത്ത് കള്ളക്കടൽ സാധ്യതയുമുണ്ട്. ഇന്ന് സംസ്ഥാനത്ത് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്. മണിക്കൂറിൽ 35 മുതൽ 45 കിലോമീറ്റർ വരെയും ചില സമയങ്ങളിൽ മണിക്കൂറിൽ 55 കിലോമീറ്റർ വരെയും വേഗതയുള്ള കാറ്റിനാണ് സാധ്യത.

ഈ മാസം 12, 13, 14, 15 തീയതികളിൽ സംസ്ഥാനത്ത് ഒറ്റപ്പെട്ടയിടങ്ങളിൽ മിതമായ മഴയ്ക്ക് സാധ്യതയുണ്ടെന്നായിരുന്നു രാവിലെ കേന്ദ്ര കാലാവസ്ഥാ വകുപ്പിൻ്റെ പ്രവചനം. 13ന് പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിൽ മിതമായ മഴയ്ക്ക് സാധ്യതയുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍ ജില്ലകളിൽ നേരിയ മഴയ്ക്കുള്ള സാധ്യതയും പ്രവചിക്കപ്പെട്ടിട്ടുണ്ട്. 14, 15 തീയതികളിൽ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളില്‍ നേരിയ മഴ പെയ്തേക്കാമെന്നും കേന്ദ്ര കാലാവസ്ഥാ വകുപ്പ് പറയുന്നു.