Kottarakkara Tipper Truck Crash: കൊട്ടാരക്കരയില് ബസ് സ്റ്റോപ്പിലേക്ക് ടിപ്പര് ലോറി പാഞ്ഞുകയറി; മൂന്ന് മരണം
Kottarakkara Neeleswaram Accident: കൊട്ടാരക്കര നീലേശ്വരത്ത് ബസ് സ്റ്റോപ്പിലേക്ക് ടിപ്പര് ലോറി പാഞ്ഞുകയറി. അപകടത്തില് മൂന്ന് പേര് മരിച്ചെന്ന് റിപ്പോര്ട്ട്. അപകടത്തില്പെട്ടവരില് കൂടുതലും സ്കൂള് വിദ്യാര്ത്ഥികളെന്ന് സൂചന. എത്ര പേര് ബസ് സ്റ്റോപ്പിലുണ്ടായിരുന്നുവെന്ന് വ്യക്തമല്ല. എട്ട് പേര് സംഭവസ്ഥലത്തുണ്ടായിരുന്നുവെന്നാണ് പ്രാഥമിക വിവരം.
കൊല്ലം: കൊട്ടാരക്കര നീലേശ്വരത്ത് ബസ് സ്റ്റോപ്പിലേക്ക് ടിപ്പര് ലോറി മറിഞ്ഞുണ്ടായ അപകടത്തില് നാലു പേര് മരിച്ചു. മരിച്ചവരില് ഹരിലാല് (54), അജയകുമാര് (45), പാര്ത്ഥിപ് (15) എന്നിവരെ തിരിച്ചറിഞ്ഞു. അപകടസമയത്ത് എട്ടു പേര് ബസ് സ്റ്റോപ്പിലുണ്ടായിരുന്നു. സ്കൂള് വിദ്യാര്ത്ഥികളടക്കം ടിപ്പറിനടിയില്പെട്ടെന്നാണ് പ്രാഥമിക വിവരം. അഞ്ചു പേര്ക്ക് പരിക്കേറ്റു. ഇതില് ചിലരുടെ നില ഗുരുതരമാണ്. വിദ്യാര്ത്ഥികളായ കുശാല് (15), ഋഷഭ് ബോബന് (15), നവനീത് (13), ജിബി ബോള് (15), ടിപ്പര് ഡ്രൈവര് നിസാം എന്നിവര്ക്കാണ് പരിക്കേറ്റത്.
പരിക്കേറ്റ രണ്ട് പേരെ കൊട്ടാരക്കര താലൂക്ക് ആശുപത്രിയില് പ്രവേശിപ്പിച്ചു. രണ്ടുപേര് മെഡിസിറ്റിയിലും, ഒരാള് ഗോകുലം മെഡിക്കല് കോളേജിലും ചികിത്സയിലാണ്. പരിക്കേറ്റ ഒരു വിദ്യാര്ത്ഥി വെന്റിലേറ്ററിലാണെന്നാണ് വിവരം.
മരണപ്പെട്ടവരില് ഹരിലാല് ട്യൂട്ടോറിയല് അധ്യാപകനാണ്. മകനെ ബസ് കയറ്റിവിടാനാണ് അജയകുമാര് എത്തിയത്. ലോറി അമിതവേഗതയിലായിരുന്നുവെന്നാണ് റിപ്പോര്ട്ട്. രാവിലെ ഏഴു മണിയോടെയായിരുന്നു അപകടം. ഇറക്കം ഇറങ്ങിവരുമ്പോള് ബൈക്കിലിടിച്ച ശേഷമാണ് ലോറി മറിഞ്ഞത്. ലോറി പൂര്ണമായും തകര്ന്ന നിലയിലാണ്.
കൂടുതല് പേര് മണ്ണിനടിയില് പെട്ടിട്ടുണ്ടോ എന്ന് അറിയാന് രക്ഷാപ്രവര്ത്തനം തുടരുകയാണ്. പൊലീസും ഫയര്ഫോഴ്സും നാട്ടുകാരുമാണ് രക്ഷാപ്രവര്ത്തനം നടത്തുന്നത്. ഫയര്ഫോഴ്സ് എത്തി ടിപ്പര് ഉയര്ത്തിയതിന് ശേഷമാണ് മണ്ണിനടിയില്പെട്ടവരെ പുറത്തെടുത്തത്. ലോറിയുടെ അമിതവേഗതയാണ് അപകടകാരണമെന്ന് സംശയിക്കുന്നു.
