Rain Alert in Kerala: മഴ മുന്നറിയിപ്പില് മാറ്റം; നാല് ജില്ലകളില് റെഡ് അലര്ട്ട്, ജാഗ്രതാ നിര്ദേശം
മെയ് 22ഓടെ തെക്ക് പടിഞ്ഞാറ് ബംഗാള് ഉള്ക്കടലില് ആദ്യ ന്യൂനമര്ദ്ദം രൂപപ്പെടാന് സാധ്യതയുണ്ടെന്നും റിപ്പോര്ട്ടുണ്ട്. വടക്ക് കിഴക്കന് ദിശയില് സഞ്ചരിച്ച് മധ്യ ബംഗാള് ഉള്ക്കടലില് തീവ്ര ന്യൂനമര്ദ്ദമായി മാറാന് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കുന്നുണ്ട്
Kerala Rain Alert
തിരുവനന്തപുരം: സംസ്ഥാനത്ത് നാല് ജില്ലകളില് റെഡ് അലര്ട്ട് പ്രഖ്യാപിച്ചു. അടുത്ത മൂന്ന് ദിവസം ആലപ്പുഴ, കോട്ടയം, ഇടുക്കി, പത്തനംതിട്ട ജില്ലകളില് അതിശക്തമായ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പ് അറിയിച്ചിരിക്കുന്നത്. എറണാകുളം, കൊല്ലം, തിരുവനന്തപുരം ജില്ലകളില് ഓറഞ്ച് അലര്ട്ട് ബാക്കി ജില്ലകളില് നിലവില് യെല്ലോ അലര്ട്ടുമാണ് പ്രഖ്യാപിച്ചിട്ടുള്ളത്.
അടുത്ത 36 മണിക്കൂറിനുള്ളില് തെക്കന് കിഴക്കന് ബംഗാള് ഉള്ക്കടല്, തെക്കന് ആന്ഡമാന് കടല്, നിക്കോബാര് ദ്വീപ് എന്നിവിടങ്ങളില് കാലവര്ഷം എത്തിച്ചേരാന് സാധ്യതയുണ്ടെന്നും പിന്നീട് മെയ് 31ഓടെ കേരളത്തില് എത്തിച്ചേര്ന്നേക്കുമെന്നും കാലാവസ്ഥ വകുപ്പ് മുന്നറിയിപ്പ് നല്കിയിട്ടുണ്ട്.
തെക്കന് തമിഴ്നാടിന് മുകളിലായി ചക്രവാതച്ചുഴി നിലനില്ക്കുന്നുണ്ട്. തെക്കന് ഛത്തീസ്ഗഢില് നിന്ന് തെക്കന് കര്ണാടക വരെ ന്യൂനമര്ദ്ദ പാത്തിയും രൂപപ്പെട്ടിട്ടുണ്ട്. മറാത്തുവാഡയില് നിന്ന് തെക്കന് തമിഴ്നാട് വഴി ചക്രവാതച്ചുഴിയിലേക്കും മറ്റൊരു ന്യൂനമര്ദ്ദ പാത്തി നീണ്ടിട്ടുണ്ട്. ഇതിന്റെ ഫലമായി കേരളത്തില് അടുത്ത 6-7 ദിവസം ഇടിമിന്നലോടെയും കാറ്റോടും കൂടിയ മിതമായ, ഇടത്തരം മഴക്ക് സാധ്യതയുണ്ട്. ഒറ്റപ്പെട്ട സ്ഥലങ്ങളില് മെയ് 19, 20, 21 തിയ്യതികളില് അതിതീവ്രമായ മഴയ്ക്കും മെയ് 19 മുതല് 22 വരെ ഒറ്റപ്പെട്ട സ്ഥലങ്ങളില് ശക്തമായ, അതിശക്തമായ മഴക്കും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു.
അതേസമയം, മെയ് 22ഓടെ തെക്ക് പടിഞ്ഞാറ് ബംഗാള് ഉള്ക്കടലില് ആദ്യ ന്യൂനമര്ദ്ദം രൂപപ്പെടാന് സാധ്യതയുണ്ടെന്നും റിപ്പോര്ട്ടുണ്ട്. വടക്ക് കിഴക്കന് ദിശയില് സഞ്ചരിച്ച് മധ്യ ബംഗാള് ഉള്ക്കടലില് തീവ്ര ന്യൂനമര്ദ്ദമായി മാറാന് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കുന്നുണ്ട്.
അതേസമയം, തിരുവനന്തപുരത്ത് മഴ ശക്തമായ സാഹചര്യമാണ്. അതിനാല് ഇന്ന് മുതല് ഇനി ഒരു അറിയിപ്പ് ഉണ്ടാകുന്നതു വരെ പൊന്മുടി ഇക്കോ ടൂറിസത്തിലേക്കുള്ള യാത്ര നിരോധിച്ചിട്ടുണ്ടെന്നും അധികൃതര് അറിയിച്ചു. തിരുവനന്തപുരം, പത്തനംതിട്ട, ആലപ്പുഴ, ഇടുക്കി, എറണാകുളം, തൃശൂര്, കണ്ണൂര് ജില്ലകളില് അടുത്ത മൂന്ന് മണിക്കൂറില് ഇടിമിന്നലോട് കൂടിയ മഴയ്ക്കും ശക്തമായ കാറ്റിനും സാധ്യതയുണ്ട്. പത്തനംതിട്ടയില് റെഡ് അലര്ട്ട് പ്രഖ്യാപിച്ച സാഹചര്യത്തില് മുന്നൊരുക്കങ്ങള് തുടങ്ങിക്കഴിഞ്ഞു.
ദുരിതാശ്വാസ ക്യാമ്പുകള് പ്രവര്ത്തിക്കാനുളള സ്ഥലങ്ങള് അധികൃതര് കണ്ടെത്തിയിട്ടുണ്ട്. മണ്ണിടിച്ചില്, ഉരുള്പൊട്ടല് സാധ്യതയുള്ള മേഖലയിലെ ആളുകളെ ആവശ്യ സാഹചര്യം ഉണ്ടായാല് മാറ്റിപ്പാര്പ്പിക്കുന്നതിനുള്ള നടപടികളും നടക്കുന്നുണ്ട്. 44 ഇടങ്ങളില് പ്രകൃതി ദുരന്തസാധ്യത ഉണ്ടെന്നാണ് അധികതരുടെ അറിയിപ്പ്. ഇതിനെ നേരിടാനുള്ള മുന്നൊരുക്കങ്ങളും നടക്കുകയാണ്.
കേരള തീരത്ത് മീന്പിടിത്തത്തിനും വിലക്കുണ്ട്. തമിഴ്നാടിന് മുകളിലായുള്ള ചക്രവാതച്ചുഴിയുടെ സ്വാധീനഫലമായാണ് കേരളത്തില് ശക്തമായ മഴ തുടരുന്നത് എന്നാണ് കാലാവസ്ഥാ ഗവേഷണ കേന്ദ്രം പറയുന്നത്. കാലവര്ഷം ഇന്ന് ആന്ഡമാന് കടലിലേക്ക് എത്തിച്ചേര്ന്നേക്കും പത്തനംതിട്ടയ്ക്കൊപ്പം തന്നെ ഇന്ന് ഇടുക്കിയിലും റെഡ് അലര്ട്ട് പ്രഖ്യാപിച്ചതിനാല് അടിയന്തര സാഹചര്യം നേരിടാനുള്ള ഒരുക്കങ്ങള് നടത്തണമെന്ന് വിവിധ വകുപ്പുകള്ക്ക് നിര്ദ്ദേശം നല്കി.
ജാഗ്രതാ നിര്ദ്ദേശം ലഭിച്ചതോടെ കളക്ട്രേറ്റിലും അഞ്ച് താലൂക്കുകളിലും കണ്ട്രോള് റൂം തുറന്നു. മാറ്റിപ്പാര്പ്പിക്കേണ്ട അളുകളുടെ പട്ടിക തയ്യാറാക്കാനും നിര്ദ്ദേശമുണ്ട്. ഒപ്പം ആവശ്യമുള്ളവരെ ക്യാമ്പിലേക്കു മാറ്റാനായി ക്യാമ്പു തുടങ്ങുന്നതിനുള്ള സ്ഥലങ്ങള് കണ്ടെത്താനും റവന്യൂ ഉദ്യോഗസ്ഥര്ക്ക് നിര്ദ്ദേശം നല്കിയിട്ടുണ്ട്.
തിരുവനന്തപുരം ജില്ലയുടെ നഗരപരിധിയിലെ ശംഖുമുഖം, വലിയതുറ ഭാഗങ്ങളിലെ വീടുകളില് വെള്ളം കയറിയതായി റിപ്പോര്ട്ട് പുറത്തുവരുന്നു. ശംഖുമുഖത്ത് മരം വീണ് ഗതാഗതം തടസപ്പെട്ടതായും വിവരം ഉണ്ട്. ശക്തമായ മഴ കാരണം ഇവിടുത്തെ മലയോര മേഖലയിലേക്ക് ജാഗ്രതയോടെയുള്ള യാത്ര വേണമെന്ന് ജില്ലാ കലക്ടര് അറിയിച്ചു.
