Teen Account: ഇൻസ്റ്റഗ്രാമിൽ മാത്രം ഒതുങ്ങില്ല; കൗമാര അക്കൗണ്ടുകൾ ഫേസ്ബുക്കിലേക്കും മെസഞ്ചറിലേക്കും
Meta Expanads Teen Account: ടീൻ അക്കൗണ്ട് ഫീച്ചർ ഫേസ്ബുക്കിലേക്കും മെസഞ്ചറിലേക്കും വ്യാപിപ്പിക്കുന്നു. ഈ മാസം എട്ടിന് മെറ്റ ഈ ഫീച്ചർ അവതരിപ്പിച്ചു എന്നാണ് റിപ്പോർട്ട്.
ഇൻസ്റ്റഗ്രാമിൽ ഏർപ്പെടുത്തിയ കൗമാര അക്കൗണ്ട് ഫീച്ചർ മെറ്റയുടെ മറ്റ് ആപ്പുകളിലേക്കും വ്യാപിപ്പിക്കുന്നു. ഫേസ്ബുക്കും മെസഞ്ചറും അടക്കമുള്ള ആപ്പുകളിൽ ഈ മാസം എട്ടിന് ഫീച്ചർ അവതരിപ്പിച്ചു എന്നാണ് വിവരം. കൗമാരക്കാരുടെ സമൂഹമാധ്യമ ഉപയോഗം നിയന്ത്രിക്കുന്നതിനായാണ് ടീൻ അക്കൗണ്ട് ഫീച്ചർ അവതരിപ്പിച്ചത്. (Image Courtesy - Social Media)
ടീൻ അക്കൗണ്ടിലൂടെ മാതാപിതാക്കൾക്ക് കുട്ടികളുടെ അക്കൗണ്ടിൽ കൂടുതൽ നിയന്ത്രണം നൽകും. ടീൻ അക്കൗണ്ട് എന്ന പേരിലാണ് ഈ ഫീച്ചർ ഒരുങ്ങുന്നത്. ടീൻ അക്കൗണ്ടിൽ മാതാപിതാക്കൾക്കാവും മേൽനോട്ടം. അക്കൗണ്ടിലെ സെറ്റിഗ്സിൽ മാറ്റം വരുത്താനും കമൻ്റ് ബോക്സും മെസേജിംഗുമൊക്കെ നിയന്ത്രിക്കാനും മാതാപിതാക്കൾക്ക് സാധിക്കും.
സ്വാഭാവികമായിത്തന്നെ പ്രൈവറ്റ് അക്കൗണ്ടുകളാവും ടീൻ അക്കൗണ്ടുകൾ. അതുകൊണ്ട് തന്നെ എല്ലാവർക്കും ഈ അക്കൗണ്ടിലെ വിവരങ്ങൾ കാണാനാവില്ല. ടീൻ അക്കൗണ്ട് ഉടമകൾക്ക് ഫോളോവേഴ്സുമായി മാത്രമേ ആശയവിനിമയം നടത്താൻ കഴിയൂ. ടാഗ്, മെൻഷൻ തുടങ്ങി വിവിധ ഫീച്ചറുകൾക്ക് ടീൻ അക്കൗണ്ടിൽ നിയന്ത്രണങ്ങളുണ്ടാവും.
18 വയസിൽ താഴെയുള്ള കുട്ടികളുടെ അക്കൗണ്ടുകൾക്കാണ് ഈ നിയന്ത്രണം ഏർപ്പെടുത്തിയിരിക്കുന്നത്. ഇവർക്ക്ലൈവ് പോകുന്നതിന് മുൻപ് മാതാപിതാക്കൾ അനുവാദം നൽകേണ്ടതുണ്ട്. ഡയറക്റ്റ് മെസേജുകളിൽ നഗ്നതയുള്ള ചിത്രങ്ങളുണ്ടെങ്കിൽ ഈ ചിത്രങ്ങൾ സ്വമേധയാ ബ്ലർ ചെയ്യുമെന്നതും ടീൻ അക്കൗണ്ടിൻ്റെ പ്രത്യേകതയാണ്.
ഫേസ്ബുക്കും ഇൻസ്റ്റഗ്രാമും ഉൾപ്പെടെയുള്ള സോഷ്യൽ മീഡിയ ആപ്പുകൾ 13 വയസിന് മുകളിലുള്ളവർക്ക് അക്കൗണ്ട് ആരംഭിക്കാൻ അനുവാദം നൽകുന്നുണ്ട്. 13 മുതൽ 18 വരെ പ്രായമുള്ള കുട്ടികളുടെ അക്കൗണ്ട് ഇനി മുതൽ ടീൻ അക്കൗണ്ട് എന്നാവും അറിയപ്പെടുക. വരുന്ന ഏതാനും മാസങ്ങൾക്കുള്ളിൽ ഈ ഫീച്ചർ നിലവിൽ വരും.
