Sanjog Gupta: ഐസിസിയുടെ അമരത്തേക്ക് മറ്റൊരു ഇന്ത്യക്കാരന് കൂടി, സഞ്ജോഗ് ഗുപ്ത പുതിയ സിഇഒ
ICC Appoints Sanjog Gupta As Its CEO: മാധ്യമമേഖലയില് 20 വര്ഷത്തിലേറെയായി പ്രവര്ത്തിക്കുന്നയാളാണ് ഇദ്ദേഹം. 2010 ൽ സ്റ്റാർ ഇന്ത്യയിൽ ചേരുന്നതിന് മുമ്പ് മാധ്യമപ്രവര്ത്തകനായിരുന്നു. 2024 ൽ ജിയോസ്റ്റാർ സ്പോർട്സിന്റെ സിഇഒ ആയി അദ്ദേഹം നിയമിതനായി. ജിയോഫ് അലാർഡിസിന് പകരമാണ് ഇദ്ദേഹം സ്ഥാനമേല്ക്കുന്നത്
ഐസിസി (ഇന്റർനാഷണൽ ക്രിക്കറ്റ് കൗൺസിൽ) ചീഫ് എക്സിക്യൂട്ടീവ് ഓഫീസറായി സഞ്ജോഗ് ഗുപ്തയെ നിയമിച്ചു. ഇന്ന് ചുമതല ഏറ്റെടുക്കും. ജിയോസ്റ്റാറിൽ സ്പോർട്സ് & ലൈവ് എക്സ്പീരിയൻസിന്റെ സിഇഒ ആയിരുന്നു. ഐസിസിയുടെ എച്ച്ആർ ആൻഡ് റെമ്യൂണറേഷൻ കമ്മിറ്റി 12 പേരാണ് ഷോര്ട്ട്ലിസ്റ്റ് ചെയ്തിരുന്നത്. ഒടുവില് നോമിനേഷൻ കമ്മിറ്റി സഞ്ജോഗ് ഗുപ്തയുടെ പേര് മുന്നോട്ടുവയ്ക്കുകയായിരുന്നു. പുതിയ ഐസിസി സിഇഒ ആയി സഞ്ജോഗ് ഗുപ്തയെ നിയമിച്ചതില് സന്തോഷമുണ്ടെന്ന് ഐസിസി ചെയർമാൻ ജയ് ഷാ പറഞ്ഞു.
”ഐസിസിയുടെ സിഇഒ ആയി സഞ്ജോഗ് ഗുപ്തയെ നിയമിച്ചതായി അറിയിക്കുന്നതിൽ സന്തോഷമുണ്ട്. കായിക തന്ത്രങ്ങളിലും വാണിജ്യവൽക്കരണത്തിലും സഞ്ജോഗിന് വിപുലമായ പരിചയമുണ്ട്, ഇത് ഐസിസിക്ക് വിലമതിക്കാനാവാത്തതായിരിക്കും”-ജയ് ഷാ പ്രസ്താവനയില് വ്യക്തമാക്കി. പുതിയ റോളിൽ സഞ്ജോഗ് ഗുപ്തയും സന്തോഷം അറിയിച്ചു.
25 രാജ്യങ്ങളിലായി 2500-ലധികം പേരില് നിന്നാണ് അപേക്ഷ ക്ഷണിച്ചത്. ഐസിസി ഡെപ്യൂട്ടി ചെയർമാൻ ഇമ്രാൻ ഖ്വാജ, ഇസിബി ചെയർമാൻ റിച്ചാർഡ് തോംസൺ, എസ്എൽസി പ്രസിഡന്റ് ഷമ്മി സിൽവ, ബിസിസിഐ സെക്രട്ടറി ദേവജിത് സൈകിയ എന്നിവരടങ്ങുന്ന നാമനിർദ്ദേശ സമിതിയാണ് ഇദ്ദേഹത്തിന്റെ പേര് ശുപാര്ശ ചെയ്തത്.
മാധ്യമമേഖലയില് 20 വര്ഷത്തിലേറെയായി പ്രവര്ത്തിക്കുന്നയാളാണ് ഇദ്ദേഹം. 2010 ൽ സ്റ്റാർ ഇന്ത്യയിൽ ചേരുന്നതിന് മുമ്പ് മാധ്യമപ്രവര്ത്തകനായിരുന്നു. 2024 ൽ ജിയോസ്റ്റാർ സ്പോർട്സിന്റെ സിഇഒ ആയി അദ്ദേഹം നിയമിതനായി. ജിയോഫ് അലാർഡിസിന് പകരമാണ് ഇദ്ദേഹം സ്ഥാനമേല്ക്കുന്നത്. ജനുവരിയിലാണ് ജിയോഫ് അലാര്ഡിസ് സ്ഥാനമൊഴിഞ്ഞത്. ഐസിസിയുടെ ഏഴാമത്തെ സിഇഒ ആണ് സഞ്ജോഗ്.
ഐസിസി ഇവന്റുകൾ, ഐപിഎൽ തുടങ്ങിയവയുടെ വളര്ച്ചയിലും പികെഎൽ, ഐഎസ്എൽ പോലുള്ള ആഭ്യന്തര സ്പോർട്സ് ലീഗുകൾ സ്ഥാപിക്കുന്നതിലും, പ്രീമിയർ ലീഗ്, വിംബിൾഡൺ തുടങ്ങിയ ആഗോള കായിക ഇനങ്ങളുടെ ജനപ്രീതി വർധിപ്പിക്കുന്നതിലും ഇദ്ദേഹം നിര്ണായക പങ്കു വഹിച്ചിട്ടുണ്ടെന്നാണ് റിപ്പോര്ട്ട്.
