UAE Passport : 21 വയസിന് മുകളിൽ പ്രായമുള്ളവരുടെ പാസ്പോർട്ടിൻ്റെ കാലാവധി 10 വർഷമായി വർധിപ്പിച്ച് യുഎഇ

UAE Passport Validity Extended (Image Courtesy - Social Media)

21 വയസിനു മുകളിൽ പ്രായമുള്ളവരുടെ പാസ്പോർട്ടിൻ്റെ കാലാവധി വർധിപ്പിച്ച് യുഎഇ. എമിറേറ്റി പാസ്പോർട്ടുകളുടെ കാലാവധി അഞ്ച് വർഷത്തേക്ക് കൂടി നീട്ടിയതായി യുഎഇ പാസ്പോർട്ട് അതോറിറ്റി ഔദ്യോഗികമായി അറിയിച്ചു. 21 വയസിന് മുകളിൽ പ്രായമുള്ളവർക്ക് ഇന്ന് (ജൂൺ 8) മുതൽ ഈ സേവനം ലഭ്യമായിത്തുടങ്ങുമെന്നും അധികൃതർ അറിയിച്ചു. നേരത്തെ, അഞ്ച് വർഷമായിരുന്നു പാസ്പോർട്ടിൻ്റെ കാലാവധി. ഇതാണ് 10 വർഷമാക്കി വർധിപ്പിച്ചത്.

എല്ലാ അഞ്ച് വർഷം കൂടുന്തോറും പാസ്പോർട്ട് പുതുക്കുന്നത് പൗരന്മാർക്കും സർക്കാർ ഉദ്യോഗസ്ഥർക്കും ബുദ്ധിമുട്ടായിരുന്നു. ഇക്കഴിഞ്ഞ മാർച്ചിൽ പാസ്പോർട്ടിൻ്റെ കാലാവധി വർധിപ്പിക്കാൻ യുഎഇ മന്ത്രിസഭായോഗം തീരുമാനിച്ചിരുന്നു. ഇതിൻ്റെ അടിസ്ഥാനത്തിലാണ് നീക്കം.

Also Read : Israel-Hamas war: ഗാസയിൽ അഭയാർത്ഥി ക്യാമ്പിലേക്ക് ഇസ്രയേൽ വ്യോമാക്രമണം; 16 പേർ കൊല്ലപ്പെട്ടതായി റിപ്പോർട്ട്

21 വയസിനു മുകളിലുള്ളവർക്ക് മാത്രമേ ഈ സൗകര്യം ലഭിക്കൂ എന്ന് പാസ്പോർട്ട് മന്ത്രാലയം ഡയറക്ടർ ജനറൽ മേജർ ജനറൽ സുഹൈൽ ജുമ അൽ ഖലീൽ പറഞ്ഞതായി ഖലീജ് ടൈംസ് റിപ്പോർട്ട് ചെയ്തു. 21 വയസിൽ താഴെയുള്ളവർക്ക് അഞ്ച് വർഷ പാസ്പോർട്ട് തന്നെയാവും തുടർന്നും ലഭിക്കുക. നിലവിൽ പാസ്പോർട്ട് ലഭിക്കുന്ന അതേ രീതിയാവും തുടർന്നും പാസ്പോർട്ട് ലഭിക്കുക. പാസ്പോർട്ടിൻ്റെ കാലാവധി തീരുമ്പോഴോ പേജുകൾ ഉപയോഗിച്ച് തീരുമ്പോഴോ പാസ്പോർട്ട് പുതുക്കലിന് അപേക്ഷിക്കാം. പ്രാദേശിക പാസ്പോർട്ട് ഓഫീസുകൾ വഴിയാണ് 10 വർഷത്തെ പാസ്പോർട്ടിലേക്ക് പുതുക്കാൻ അപേക്ഷ നൽകേണ്ടത്. വേഗത്തിൽ പാസ്പോർട്ട് പുതുക്കാൻ അബുദാബി, ദുബായ്, ഷാർജ എന്നീ വിമാനത്താവളങ്ങളിലെ പാസ്പോർട്ട് ഓഫീസുകൾ സന്ദർശിക്കാം. എല്ലായ്പ്പോഴും തുറന്നിരിക്കുന്ന ഓഫീസുകളാണ് ഇത്. വിദേശത്ത് താമസിക്കുന്നവർക്ക് യുഎഇഒ എംബസി വഴിയും കോൺസുലേറ്റുകൾ വഴിയും 10 വർഷ പാസ്പോർട്ടിലേക്ക് മാറാം.