Smriti irani: ദേ നമ്മുടെ മുൻമന്ത്രി സീരിയലിൽ … 15 വർഷത്തിനു ശേഷം സ്മൃതി ഇറാനി വീണ്ടും അഭിനയിക്കുന്നു
Smriti Irani is making a comeback: 15 വർഷത്തെ ഇടവേളയ്ക്ക് ശേഷമാണ് സ്മൃതിയുടെ ഈ തിരിച്ചുവരവ്. മെറൂൺ സാരിയും വട്ടപ്പൊട്ടും പരമ്പരാഗത ആഭരണങ്ങളും ധരിച്ചാണ് ഫസ്റ്റ് ലുക്കിൽ സ്മൃതി പ്രത്യക്ഷപ്പെടുന്നത്.
ന്യൂഡൽഹി: മുൻ കേന്ദ്രമന്ത്രി സ്മൃതി ഇറാനി ടെലിവിഷൻ രംഗത്തേക്ക് മടങ്ങിയെത്തുന്നു എന്ന വാർത്തകൾക്ക് സ്ഥിരീകരണമായി. ഏറെ ജനപ്രിയമായ ‘ക്യുങ്കി സാസ് ഭി കഭി ബഹു ഥി’ എന്ന പരമ്പരയുടെ രണ്ടാം ഭാഗത്തിൽ, സ്മൃതി അവതരിപ്പിക്കുന്ന കഥാപാത്രമായ തുളസി വിരാനിയുടെ ഫസ്റ്റ് ലുക്ക് പുറത്തുവിട്ടു. 15 വർഷത്തെ ഇടവേളയ്ക്ക് ശേഷമാണ് സ്മൃതിയുടെ ഈ തിരിച്ചുവരവ്. മെറൂൺ സാരിയും വട്ടപ്പൊട്ടും പരമ്പരാഗത ആഭരണങ്ങളും ധരിച്ചാണ് ഫസ്റ്റ് ലുക്കിൽ സ്മൃതി പ്രത്യക്ഷപ്പെടുന്നത്.
പരമ്പരയുടെ പ്രാധാന്യം
ഇന്ത്യൻ ടെലിവിഷൻ ചരിത്രത്തിലെ ഏറ്റവും വിജയകരമായ പരിപാടികളിൽ ഒന്നായിരുന്നു ‘ക്യുങ്കി സാസ് ഭി കഭി ബഹു ഥി’. ഈ പരമ്പര ഇതിലെ അഭിനേതാക്കളുടെ കരിയറിൽ ഒരു വലിയ വഴിത്തിരിവായി മാറുകയും ചെയ്തു. ശോഭ കപൂറും ഏക്ത കപൂറും ചേർന്ന് നിർമ്മിച്ച ഈ പരമ്പര, തുളസി വിരാനി (സ്മൃതി ഇറാനി) എന്ന മാതൃകാ മരുമകളുടെയും അവരുടെ ഭർത്താവ് മിഹിർ വിരാനിയുടെയും (അമർ ഉപാധ്യായ) കുടുംബ ജീവിതത്തെക്കുറിച്ചുള്ള കഥയാണ് പറഞ്ഞത്.
റേറ്റിംഗിലെ മുന്നേറ്റം
2000 മുതൽ 2008 വരെയാണ് ‘ക്യുങ്കി സാസ് ഭി കഭി ബഹു ഥി’ സംപ്രേക്ഷണം ചെയ്തത്. അമിതാഭ് ബച്ചൻ അവതാരകനായ ‘കോൻ ബനേഗാ ക്രോർപതി’യോടൊപ്പം ആരംഭിച്ച ഈ ഷോ, ഏകദേശം ഏഴ് വർഷത്തോളം ടിആർപി ചാർട്ടുകളിൽ ഒന്നാം സ്ഥാനത്ത് തുടർന്നു. ഈ പരമ്പരയിലെ അഭിനയത്തിന്, സ്മൃതി ഇറാനിക്ക് ഇന്ത്യൻ ടെലിവിഷൻ അക്കാദമി അവാർഡുകളിൽ മികച്ച നടി – ജനപ്രിയ വിഭാഗത്തിൽ തുടർച്ചയായി അഞ്ച് പുരസ്കാരങ്ങളും രണ്ട് ഇന്ത്യൻ ടെലി അവാർഡുകളും ലഭിച്ചു.
