Thug Life Movie Controversy: തഗ് ലൈഫ് നിരോധനം; കർണാടക ഫിലിം ചേംബറിനെതിരെ കമൽഹാസൻ ഹൈക്കോടതിയിൽ

ത​ഗ് ലൈഫ് സിനിമ നിരോധിച്ച കർണാടക ഫിലിം ചേംബർ നടപടിക്കെതിരെ നടൻ കമൽഹാസൻ ഹൈക്കോടതിയിൽ. ചിത്രം നിരോധിക്കുന്നത് നിയമവിരുദ്ധമെന്ന് ചൂണ്ടിക്കാട്ടി നടൻ കർണാടക ഹൈക്കോടതിയിൽ ഹർജി നൽകി. കമൽഹാസന് വേണ്ടി രാജ് കമൽ ഇന്‍റർനാഷണലാണ് ഹർജി നൽകിയത്. നടന്റെ വാക്കുകൾ സാഹചര്യത്തിൽ നിന്ന് അടർത്തിമാറ്റി വളച്ചൊടിച്ചെന്ന് ഹർജിയിൽ പറയുന്നു.

അതേസമയം കോടതിയിൽ പോയാലും സംസ്ഥാനത്തെ ഒരു തിയേറ്ററിലും ‘തഗ് ലൈഫ്’ പ്രദർശിപ്പിക്കില്ലെന്ന നിലപാടിലാണ് കർണാടക ഫിലിം ചേംബർ ഓഫ് കൊമേഴ്‌സ് (കെഎഫ്‌സിസി). ‘അദ്ദേഹം കോടതിയിൽ പോകട്ടെ. ഞങ്ങളുടെ ഒരു തിയേറ്ററിലും ചിത്രം പ്രദർശിപ്പിക്കില്ല,’ എന്ന് കെഎഫ്‌സിസി പ്രസിഡന്റ് എം നരസിംഹലു പറഞ്ഞു.

ALSO READ: തിയറ്ററിൽ പൊട്ടിച്ചിരി പടർത്തിയ പടക്കളം ഒടിടിയിലേക്ക്; എപ്പോൾ, എവിടെ കാണാം?

കന്നഡ തമിഴിൽ നിന്ന് ഉരുത്തിരിഞ്ഞതാണെന്ന് കമലഹാസൻ അടുത്തിടെ നടത്തിയ പ്രസ്താവനയാണ് വിവാദത്തിന് തിരികൊളുത്തിയത്. കന്നഡ അനുകൂല ഗ്രൂപ്പുകളിൽ നിന്ന് പ്രതിഷേധവും പരസ്യമായി മാപ്പ് പറയണമെന്ന ആവശ്യവും ഉയർന്നുവന്നു. എന്നാൽ പരാമർശത്തിൽ മാപ്പ് പറയില്ലെന്ന് കമൽഹാസൻ നിലപാടെടുത്തതോടെ ഫിലിം ചേംബർ കർണാടകയിൽ സിനിമ പ്രദർശിപ്പിക്കില്ലെന്ന തീരുമാനമെടുക്കുകയായിരുന്നു.

37 വർഷങ്ങൾക്കു ശേഷം കമൽ ഹാസനും മണി രത്നവും ഒന്നിക്കുന്ന ചിത്രമാണ് ത​ഗ് ലൈഫ്. ജൂൺ 5 ന് ചിത്രം തിയറ്ററുകളിലെത്തും. സിലമ്പരശൻ, തൃഷ, അഭിരാമി, ജോജു ജോർജ്, ഐശ്വര്യ ലക്ഷ്മി, നാസർ, അശോക് സെല്‍വന്‍, അലി ഫസല്‍, പങ്കജ് ത്രിപാഠി, ജിഷു സെന്‍ഗുപ്ത, സാന്യ മല്‍ഹോത്ര, രോഹിത് ഷറഫ്, വൈയാപുരി തുടങ്ങിയവരാണ് സിനിമയിലെ മറ്റു കഥാപാത്രങ്ങളെ അവതരിപ്പിക്കുന്നത്.

രാജ്കമൽ ഫിലിംസ് ഇന്റർനാഷണൽ, മദ്രാസ് ടാക്കീസ്, റെഡ് ജയന്റ് മൂവീസ്, ആർ മഹേന്ദ്രൻ, ശിവ അനന്ത് എന്നിവർ ചേർന്നാണ് തഗ് ലൈഫ് നിർമ്മാണം. ഗോകുലം മൂവീസിനായി ഗോകുലം ഗോപാലനാണ് തഗ് ലൈഫ് കേരളത്തിലെത്തിക്കുന്നത്. തഗ് ലൈഫിന്റെ കേരളാ ഡിസ്റ്റ്രിബ്യൂഷൻ പാർട്ട്നർ ഡ്രീം ബിഗ് ഫിലിംസാണ്.