വ്യാജ വോട്ടുകൾ നീക്കം ചെയ്യുമ്പോൾ രാഹുലിന് എന്തിനാണ് ഇത്ര വയറുവേദന? ഹൈദരാബാദിൽ കോൺഗ്രസിനെതിരെ ആഞ്ഞടിച്ച് അമിത് ഷാ

ഹൈദരാബാദ്: തെലങ്കാനയിൽ കോൺഗ്രസിന്റെ അരാജക ഭരണം അവസാനിപ്പിക്കാൻ ലക്ഷ്യമിട്ടാണ് ബിജെപി മുന്നോട്ട് പോകുന്നതെന്ന് കേന്ദ്ര ആഭ്യന്തരമന്ത്രി അമിത് ഷാ. ഹൈദരാബാദിൽ ബിജെപി സംഘടിപ്പിച്ച മഹാപാദയാത്രാ സമാപനത്തോടനുബന്ധിച്ച് മോസംജാഹി മാർക്കറ്റിന് സമീപം നടന്ന വലിയ പൊതുസമ്മേളനത്തിലാണ് അദ്ദേഹം കോൺഗ്രസിനെയും ലോക്സഭ പ്രതിപക്ഷ നേതാവ് രാഹുൽ ഗാന്ധിക്കുമെതിരെ രൂക്ഷമായ വിമർശനങ്ങൾ ഉന്നയിച്ചത്. തെലങ്കാനയിൽ ബിജെപി സർക്കാർ വരേണ്ട സമയം അതിക്രമിച്ചുവെന്നും സംസ്ഥാനത്ത് കാവി പതാക ഉയരുമെന്നും അദ്ദേഹം ബിജെപി അണികളോട് ആത്മവിശ്വാസം പ്രകടിപ്പിച്ചു. SIR-നെ കുറിച്ച് കോൺഗ്രസ് നടത്തുന്ന അപവാദ പ്രചാരണങ്ങൾക്കെതിരെയും അമിത് ഷാ ശക്തമായി അപലപിച്ചു. എസ്‌ഐആർ നടപടികളെ തടയാൻ കോൺഗ്രസ് ആൻഡ് കമ്പനി കുടിലതന്ത്രങ്ങൾ മെനയുകയാണെന്ന് അദ്ദേഹം കുറ്റപ്പെടുത്തി. ഡെൽഹി രാംലീലാ മൈതാനത്ത് കോൺഗ്രസ് സംഘടിപ്പിച്ചത് ‘വോട്ടുകൾ സംരക്ഷിക്കാനുള്ള’ റാലിയല്ലെന്നും, മറിച്ച് നുഴഞ്ഞുകയറ്റക്കാരെ സംരക്ഷിക്കാനുള്ള റാലിയാണെന്നും അദ്ദേഹം പരിഹസിച്ചു. രാജ്യത്തേക്ക് അനധികൃതമായി എത്തിയ നുഴഞ്ഞുകയറ്റക്കാരെ സ്വന്തം വോട്ട് ബാങ്കാക്കി മാറ്റുന്നതാണ് കോൺഗ്രസിന്റെ രീതിയെന്ന് അദ്ദേഹം തുറന്നടിച്ചു.

വോട്ട് നീക്കം ചെയ്യലിൽ രാഹുലിന് എന്തിനാണ് ഇത്ര വയറുവേദന?

രാജ്യത്ത് 13 കോടി വോട്ടുകൾ റദ്ദാക്കിയെന്ന് കോൺഗ്രസ് പച്ചക്കള്ളം പ്രചരിപ്പിക്കുകയാണെന്ന് അമിത് ഷാ വ്യക്തമാക്കി. യഥാർത്ഥത്തിൽ മരണപ്പെട്ടവരുടെ ഏകദേശം 3 കോടി വോട്ടുകളും, മറ്റ് സ്ഥലങ്ങളിലേക്ക് താമസം മാറിയവരുടെ 6.5 കോടി വോട്ടുകളുമാണ് റദ്ദാക്കിയതെന്ന് അദ്ദേഹം വിശദീകരിച്ചു. രണ്ടിടങ്ങളിൽ വോട്ടുള്ളവരുടെ പേരുകൾ നീക്കം ചെയ്യണമോ വേണ്ടയോ എന്ന് സമ്മേളനത്തിനെത്തിയ ജനങ്ങളോട് അദ്ദേഹം ചോദിച്ചു. മറ്റൊന്ന്, ഇലക്ഷൻ കമ്മീഷന്റെ ചട്ടങ്ങൾ പാലിച്ചുകൊണ്ട് ഒരു കോടിയോളം വരുന്ന വ്യാജ വോട്ടുകൾ മാത്രമാണ് നീക്കം ചെയ്തതെന്നും അദ്ദേഹം വ്യക്തമാക്കി. നുഴഞ്ഞുകയറ്റക്കാരെ രാഹുൽ ഗാന്ധി എന്തിനാണ് പിന്തുണയ്ക്കുന്നതെന്ന് അമിത് ഷാ ചോദിച്ചു. വ്യാജ വോട്ടുകൾ നീക്കം ചെയ്യുമ്പോൾ രാഹുൽ ഗാന്ധിക്ക് എന്തിനാണ് ഇത്ര വയറുവേദന വരുന്നതെന്ന് ജനങ്ങൾ മനസ്സിലാക്കണമെന്നും അമിത് ഷാ പറഞ്ഞു.

ജനങ്ങളുടെ പിന്തുണ കൊണ്ടാണ് ബിജെപിയുടെ വിജയങ്ങൾ!

കേവലം എസ്‌ഐആർ നടപടികൾ കാരണമാണ് ബിജെപി വിജയിച്ചതെന്ന രാഹുൽ ഗാന്ധിയുടെ പ്രസ്താവന തികച്ചും ഹാസ്യാസ്പദമാണെന്ന് അമിത് ഷാ തള്ളിക്കളഞ്ഞു. 2014, 2019 സാർവത്രിക തിരഞ്ഞെടുപ്പുകളിൽ എസ്‌ഐആർ പ്രക്രിയകൾ ഇല്ലാതെ തന്നെ രാജ്യത്തെ ജനങ്ങൾ പൂർണ്ണ ഭൂരിപക്ഷത്തോടെ നരേന്ദ്ര മോദിയുടെ നേതൃത്വത്തെ വിജയിപ്പിച്ച കാര്യം അദ്ദേഹം ഓർമ്മിപ്പിച്ചു. രാജ്യത്തുടനീളമുള്ള നിരവധി സംസ്ഥാനങ്ങളിൽ എസ്‌ഐആർ നടക്കുന്നതിന് മുമ്പ് തന്നെ ബിജെപി വൻ വിജയങ്ങൾ നേടിയിട്ടുണ്ടെന്ന് അദ്ദേഹം വ്യക്തമാക്കി. പ്രധാനമന്ത്രി മോദി ജനക്ഷേമവും രാജ്യവികസനവും മുൻനിർത്തി ജനങ്ങളുടെ പിന്തുണ നേടിയാണ് വിജയിച്ചതെന്ന് അദ്ദേഹം പറഞ്ഞു.

പട്ടേലിന്റെ പരിശ്രമം കൊണ്ടാണ് ഹൈദരാബാദ് കൂട്ടിച്ചേർത്തത്

ഹൈദരാബാദിന്റെ ചരിത്രം പരാമർശിച്ചുകൊണ്ട്, രാജ്യത്തെ ആദ്യ ആഭ്യന്തരമന്ത്രി സർദാർ വല്ലഭ്ഭായി പട്ടേലിന്റെ ദൃഢനിശ്ചയമുണ്ടായിരുന്നില്ലെങ്കിൽ ഹൈദരാബാദ് നാട്ടുരാജ്യം ഇന്ത്യയിൽ ലയിക്കുമായിരുന്നില്ലെന്ന് അമിത് ഷാ ഓർമ്മിപ്പിച്ചു. തെലങ്കാന മണ്ണിൽ കോൺഗ്രസ് നടത്തുന്ന ജനവിരുദ്ധ നയങ്ങൾ ഇനി സഹിക്കില്ലെന്നും ഭാവിയിൽ തെലങ്കാനയിൽ ബിജെപി സർക്കാർ അധികാരത്തിൽ വരുന്നത് തീർച്ചയാണെന്നും അദ്ദേഹം വ്യക്തമാക്കി.

തെലങ്കാനയിലെ ബിജെപിയുടെ മഹാപദയാത്രയ്ക്ക് തുടക്കമിട്ട് അമിത് ഷാ