India Pakistan Conflict: അതിർത്തിയിലെ സംഘർഷങ്ങൾ കുറച്ച് സമാധാനം പുനസ്ഥാപിക്കണം: എംഎ ബേബി
MA Baby On India Pakistan Conflict: അതിർത്തിയിൽ സമാധാനം പുനസ്ഥാപിക്കാനുള്ള ശ്രമങ്ങൾ നടത്താൻ കേന്ദ്രം ശ്രമിക്കണമെന്ന് സിപിഎം. ദേശീയ ജനറൽ സെക്രട്ടറി എംഎ ബേബിയാണ് ഇക്കാര്യം ആവശ്യപ്പെട്ടത്.
എംഎ ബേബി
അതിർത്തിയിലെ സംഘർഷങ്ങൾ കുറച്ച് സമാധാനം പുനസ്ഥാപിക്കാൻ കേന്ദ്രസർക്കാർ ശ്രമിക്കണമെന്ന് സിപിഎം ദേശീയ ജനറൽ സെക്രട്ടറി എംഎ ബേബി. ഭീകരവാദം അവസാനിപ്പിക്കുന്നതിൽ സിപിഎം സഹകരിക്കും. പഹൽഗാം ഭീകരരെ കൈമാറാൻ ഇന്ത്യ പാകിസ്താനിൽ സമ്മർദ്ദം ചെലുത്തണമെന്നും എംഎ ബേബി പറഞ്ഞു. തിരുപ്പതിയിൽ നടത്തിയ വാർത്താസമ്മേളനത്തിലാണ് അദ്ദേഹത്തിൻ്റെ പ്രതികരണം.
രാജ്യത്തിൻ്റെ അതിർത്തിയിലുണ്ടാവുന്ന സംഘർഷങ്ങൾ കുറച്ച് സാധാരണ നില പുനസ്ഥാപിക്കണം. സമാധാനം ഉറപ്പാക്കുന്നതിനായി കേന്ദ്രസർക്കാർ പ്രവർത്തിപ്പിക്കണം. ഇതിനാവശ്യമായ നടപടികൾ കേന്ദ്രം സ്വീകരിക്കണം. രാജ്യാതിർത്തിയിൽ പാകിസ്താൻ നടത്തുന്ന പ്രകോപനപരമായ പ്രവർത്തനങ്ങൾക്ക് മറുപടി നൽകാൻ കേന്ദ്ര സർക്കാർ സമയബന്ധിതവും ഉചിതവുമായ തീരുമാനങ്ങൾ എടുക്കണം. നിരപരാധികളുടെ ജീവനും സ്വത്തിനും നഷ്ടം സംഭവിക്കാതിരിക്കാനുള്ള മുൻകരുതലുകൾ കേന്ദ്രം സ്വീകരിക്കണമെന്നും എംഎ ബേബി ആവശ്യപ്പെട്ടു.
ഇന്ത്യ – പാകിസ്ഥാൻ സംഘർഷം രൂക്ഷമായി തുടരുകയാണ്. ജമ്മു കശ്മീരിലെ സാംബയിൽ നുഴഞ്ഞുകയറാൻ ശ്രമിച്ച ഏഴ് ഭീകരരെ അതിർത്തി രക്ഷാ സേന (ബിഎസ്എഫ്) വധിച്ചിരുന്നു. ഭീകരസംഘടനയായ ജെയ്ഷെ മുഹമ്മദിലെ അംഗങ്ങളാണ് കൊല്ലപ്പെട്ടതെന്ന് റിപ്പോർട്ടുകൾ സൂചിപ്പിക്കുന്നു. ഈ മാസം എട്ടിന് രാത്രി 11 മണിയോടെ നുഴഞ്ഞുകയറ്റക്കാരെ ബിഎസ്എഫ് വെടിവച്ച് വീഴ്ത്തുകയായിരുന്നു. ആഭ്യന്തരമന്ത്രി അമിത് ഷാ അതിർത്തിയിലെ സ്ഥിതിഗതികൾ വിലയിരുത്തി. വിമാനത്താവളങ്ങളുടെ സുരക്ഷാ ക്രമീകരണങ്ങളും വിലയിരുത്തിയ അദ്ദേഹം മുതിർന്ന നേതാക്കളുമായി കൂടിക്കാഴ്ച നടത്തുകയും ചെയ്തു.
