Namma Metro: നാഗവാര യാത്ര കൂടുതല് എളുപ്പമാകുന്നു; നമ്മ മെട്രോ പിങ്ക് ലൈന് മെയ് മാസത്തിൽ തുറക്കും
Pink Line Bengaluru Metro Update: ആദ്യഘട്ടത്തില് കലേന അഗ്രഹാരയ്ക്കും തവരേക്കരെയ്ക്കും ഇടയിലുള്ള 7.5 കിലോമീറ്റര് എലിവേറ്റഡ് മെട്രോ പാതയുടെ നിര്മാണമാണ് നിലവില് പൂര്ത്തിയാക്കിയത്. ഇവിടെ ആറ് മെട്രോ സ്റ്റേഷനുകളുണ്ടായിരിക്കും.
നമ്മ മെട്രോ
ബെംഗളൂരു: മെട്രോ യാത്രക്കാര് ദീര്ഘനാളായി കാത്തിരിക്കുന്ന പിങ്ക് ലൈന് തുറക്കാന് പോകുന്നു. പിങ്ക് ലൈനില് ട്രെയിനുകളുടെ പരീക്ഷണയോട്ടം ആരംഭിച്ചു. കലേന അഗ്രഹാര മുതല് നാഗവാര വരെയുള്ള റൂട്ടാണ് പിങ്ക് ലൈന്. ആകെ 21.25 കിലോമീറ്റര് ദൈര്ഘ്യമുള്ള പാതയുടെ നിര്മാണം ഘട്ടം ഘട്ടമായാണ് പൂര്ത്തിയാക്കുന്നത്.
ആദ്യഘട്ടത്തില് കലേന അഗ്രഹാരയ്ക്കും തവരേക്കരെയ്ക്കും ഇടയിലുള്ള 7.5 കിലോമീറ്റര് എലിവേറ്റഡ് മെട്രോ പാതയുടെ നിര്മാണമാണ് നിലവില് പൂര്ത്തിയാക്കിയത്. ഇവിടെ ആറ് മെട്രോ സ്റ്റേഷനുകളുണ്ടായിരിക്കും. പരീക്ഷണയോട്ടവും സുരക്ഷ പരിശോധനകളും വിജയകരമായി പൂര്ത്തിയാക്കിയാല് 2026 മെയ് മാസത്തോടെ ട്രെയിന് സര്വീസ് ഔദ്യോഗികമായി ആരംഭിക്കും.
തവരെക്കരെ മുതല് നാഗവാര വരെയുള്ള ശേഷിക്കുന്ന ലൈന് ഭൂഗര്ഭ പാതയായിരിക്കും. ഇവിടെ 12 ഭൂഗര്ഭ മെട്രോ സ്റ്റേഷനുകള് ഉണ്ടായിരിക്കും. ഇതിന്റെ നിര്മാണവും പരിശോധനകളും പൂര്ത്തിയായി കഴിഞ്ഞാല് 2026 നവംബര് മാസത്തോടെ ഗതാഗതത്തിനായി തുറന്നുകൊടുക്കും.
Also Read: Namma Metro: പിങ്ക് ലൈനില് ട്രെയിന് ഓടിത്തുടങ്ങി; 10 മിനിറ്റില് ബെംഗളൂരു നഗരം ചുറ്റിവരാം
ട്രാക്ക് അലൈന്മെന്റ്, സിഗ്നലിങ് സംവിധാനങ്ങള്, സുരക്ഷ മാനദണ്ഡങ്ങള് എന്നിവ വിലയിരുത്തുന്നതിനായാണ് ട്രയല് റണ് നടത്തുന്നത്. പൊതുജനങ്ങള്ക്കായി തുറന്നുകൊടുക്കുന്നതിന് മുമ്പ് ഈ പരിശോധനകള് അനിവാര്യമാണ്.
പിങ്ക് ലൈന് പ്രവര്ത്തന സജ്ജമാകുന്നതോടെ ബെംഗളൂരുവിന്റെ വടക്ക്-തെക്ക് ദിശകളെ പൂര്ണമായും ബന്ധിപ്പിക്കാന് സാധിക്കും. ആയിരക്കണക്കിന് യാത്രക്കാര്ക്ക് ഇത് കൂടുതല് ഉപകാരപ്പെടും.
