Kerala Rain Alert: സംസ്ഥാനത്ത് വീണ്ടും കാലാവസ്ഥാ വ്യതിയാനം; ഇനിയും മഴ കനക്കുമോ? നാളത്തെ മുന്നറിയിപ്പ് ഇതാ
Kerala Weather Update for tomorrow: മധ്യ പടിഞ്ഞാറൻ ബംഗാൾ ഉൾക്കടൽ മുതൽ അറബിക്കടൽ വരെ കേരളത്തിന് മുകളിലൂടെ കടന്നുപോകുന്ന ന്യൂനമർദ്ദ പാത്തി ആണ് നിലവിലെ മഴയെ സ്വാധീനിക്കുന്നത്. സമുദ്രനിരപ്പിൽ നിന്ന് 3.2 കിലോമീറ്റർ ഉയരത്തിൽ ഇന്നലെ രാത്രിയോടെയാണ് ഇത് രൂപപ്പെട്ടത്. ഇതിന് പുറമെ ആന്ധ്രാപ്രദേശിന് മുകളിലായി ഒരു ചക്രവാതച്ചുഴിയും രൂപപ്പെട്ടിട്ടുണ്ട്. ഇതിന്റെ സ്വാധീനത്താൽ കേരളത്തിലും തമിഴ്നാട്ടിലും ഇന്ന് മഴ തുടരും.
തിരുവനന്തപുരം: ഇന്നലെ താൽക്കാലികമായി വിട്ടുനിന്നതിന് ശേഷം സംസ്ഥാനത്ത് ഇന്ന് പുലർച്ചെയോടെ മഴ വീണ്ടും സജീവമായി. ഇന്ന് മഴ വീണ്ടും ശക്തമാകുമെന്നാണ് കേന്ദ്ര കാലാവസ്ഥ വകുപ്പിന്റെ പുതുക്കിയ മുന്നറിയിപ്പ്. തീവ്രമഴ കണക്കിലെടുത്ത് കോഴിക്കോട് ജില്ലയിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. പത്തനംതിട്ട, ഇടുക്കി ജില്ലകളിൽ മഞ്ഞ (യെല്ലോ) അലർട്ടും നിലവിലുണ്ട്.
എറണാകുളം, കോട്ടയം, മലപ്പുറം, കോഴിക്കോട് ജില്ലകളിലാണ് ഇന്ന് പുലർച്ചെ നാല് മണി മുതൽ പ്രധാനമായും മഴ ലഭിച്ചു തുടങ്ങിയത്. നിലവിൽ തീരദേശങ്ങളിലും ഇടനാട് പ്രദേശങ്ങളിലുമാണ് കൂടുതൽ മഴ പെയ്യുന്നത്; കിഴക്കൻ മേഖലകളിൽ മഴ കുറവാണ്.
കാലാവസ്ഥാ വ്യതിയാനത്തിന് പിന്നിലെ കാരണങ്ങൾ
മധ്യ പടിഞ്ഞാറൻ ബംഗാൾ ഉൾക്കടൽ മുതൽ അറബിക്കടൽ വരെ കേരളത്തിന് മുകളിലൂടെ കടന്നുപോകുന്ന ന്യൂനമർദ്ദ പാത്തി ആണ് നിലവിലെ മഴയെ സ്വാധീനിക്കുന്നത്. സമുദ്രനിരപ്പിൽ നിന്ന് 3.2 കിലോമീറ്റർ ഉയരത്തിൽ ഇന്നലെ രാത്രിയോടെയാണ് ഇത് രൂപപ്പെട്ടത്. ഇതിന് പുറമെ ആന്ധ്രാപ്രദേശിന് മുകളിലായി ഒരു ചക്രവാതച്ചുഴിയും രൂപപ്പെട്ടിട്ടുണ്ട്. ഇതിന്റെ സ്വാധീനത്താൽ കേരളത്തിലും തമിഴ്നാട്ടിലും ഇന്ന് മഴ തുടരും.
ALSO READ: എൽ നിനോ വില്ലനായി, ശക്തമായ മഴ രണ്ട് ജില്ലകളിൽ; ഇന്നത്തെ കാലാവസ്ഥ
ഉപഗ്രഹ നിരീക്ഷണ പ്രകാരം ലക്ഷദ്വീപിലെ കവരത്തി മുതൽ കേരള തീരം വരെ കടലിന് മുകളിൽ മേഘങ്ങൾ രൂപപ്പെട്ടിട്ടുണ്ട്. ഇവ എറണാകുളത്തിനും കണ്ണൂരിനും ഇടയിലുള്ള പ്രദേശങ്ങളിൽ ഇനിയുള്ള മണിക്കൂറുകളിലും മഴ നൽകുമെങ്കിലും വരും ദിവസങ്ങളിൽ മഴയുടെ ശക്തി കുറയാനാണ് സാധ്യത.
വരും ദിവസങ്ങളിലെ അലർട്ടുകൾ
- ബുധനാഴ്ച (ഇന്ന്): ആലപ്പുഴ, എറണാകുളം, തൃശൂർ, മലപ്പുറം, വയനാട്, കണ്ണൂർ ജില്ലകളിൽ ശക്തമായ മഴ മുന്നറിയിപ്പുണ്ട്.
- വ്യാഴാഴ്ച (നാളെ): പത്തനംതിട്ട, കോട്ടയം, എറണാകുളം, ഇടുക്കി, തൃശൂർ, പാലക്കാട്, മലപ്പുറം ജില്ലകളിൽ യെല്ലോ അലർട്ട്.
- ഞായറാഴ്ച: മലപ്പുറം മുതൽ കാസർകോട് വരെയുള്ള ജില്ലകളിൽ ശക്തമായ മഴ സാധ്യത മുൻനിർത്തി യെല്ലോ അലർട്ട്.
മത്സ്യത്തൊഴിലാളി ജാഗ്രതാ നിർദ്ദേശം
കേരള – കർണാടക – ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് തടസ്സമില്ല. എന്നാൽ സോമാലിയൻ തീരം, തെക്കുപടിഞ്ഞാറൻ അറബിക്കടൽ, അതിനോട് ചേർന്ന മധ്യപടിഞ്ഞാറൻ അറബിക്കടൽ എന്നിവിടങ്ങളിൽ മണിക്കൂറിൽ 45 മുതൽ 55 കിലോമീറ്റർ വരെയും, ചില അവസരങ്ങളിൽ 65 കിലോമീറ്റർ വരെയും വേഗതയിൽ ശക്തമായ കാറ്റിന് സാധ്യതയുള്ളതിനാൽ ജാഗ്രത പാലിക്കേണ്ടതാണ്.
English Summary
Heavy rain has returned to Kerala due to a newly formed atmospheric trough and cyclonic circulation, prompting an orange alert for Kozhikode and yellow alerts in several other districts. While coastal and midland areas will continue to see rain over the next few hours, meteorologists predict the intensity will decrease in the coming days.
