കേരള ബജറ്റ്

വരാൻ പോകുന്ന സാമ്പത്തിക വർഷത്തേക്കുള്ള രാജ്യത്തെ അല്ലെങ്കിൽ സംസ്ഥാനത്തെ വരവ് ചിലവ് കണക്കുകളുടെ വിവരണമാണ് ബജറ്റ്. ബജറ്റ് അവതരിപ്പിക്കുന്നതിനൊപ്പം അടുത്ത സാമ്പത്തിക വർഷത്തിൽ ഏതെല്ലാം പദ്ധതികൾ സർക്കാർ മുന്നോട്ട് വെക്കുമെന്നും അതിനെല്ലാം എത്രത്തോളം ചിലവ് വിനിയോഗിക്കുമെന്നും അറിയിക്കും. ഫെബ്രുവരി മാർച്ച് മാസങ്ങളിലായിട്ടാണ് സാധാരണയായി കേന്ദ്ര ബജറ്റ് പാർലമെൻ്റിൽ അവതരിപ്പിക്കുക. അതിന് മുമ്പായി വിവിധ സംസ്ഥാനങ്ങളിൽ ബജറ്റ് അവതരിപ്പിക്കും. ഇനി പുതിയ ഒരു സർക്കാർ അധികാരത്തിൽ വന്നാൽ അപ്പോഴും പ്രത്യേക ബജറ്റ് അവതരിപ്പിക്കുന്നതാണ്.

നമ്മുടെ രാജ്യത്ത് രണ്ട് തരത്തിലുള്ള ബജറ്റാണുള്ളത്. ഒന്ന് ഇടക്കാല ബജറ്റ്, രണ്ടാമത്തേത് സമ്പൂർണ ബജറ്റ്. ഒരു സർക്കാരിൻ്റെ കാലാവധി തീരുന്നതിന് തൊട്ടുമുമ്പായി അവതരിപ്പിക്കുന്ന ബജറ്റിനെയാണ് ഇടക്കാല ബജറ്റ് എന്ന പറയുന്നത്. ഈ ഇടക്കാല ബജറ്റിന് ശേഷം പുതിയ സർക്കാർ അധികാരത്തിലെത്തി കഴിഞ്ഞിട്ടുള്ള ആദ്യ പാർലമെൻ്റ് അല്ലെങ്കിൽ നിയമസഭ സമ്മേളനത്തിൽ ആ വർഷത്തെ സമ്പൂർണ ബജറ്റും അവതരിപ്പിക്കുന്നതാണ്. അതേസമയം സാധാരണയായി എല്ലാ വർഷവും അവതരിപ്പിക്കുന്ന ബജറ്റുകൾ സമ്പൂർണ ബജറ്റുകളാണ്.

നിലവിൽ രാജ്യത്ത് ഏറ്റവും കൂടുതൽ തവണ ബജറ്റുകൾ അവതരിപ്പിച്ചിട്ടുള്ളത് മുൻ പ്രധാനമന്ത്രി മൊറാജി ദേശായിയാണ്. പത്ത് തവണയാണ് മൊറാജി ദേശായി പാർലമെൻ്റിൽ ബജറ്റ് അവതരിപ്പിച്ചിട്ടുള്ളത്. നിലവിലെ ധനകാര്യ മന്ത്രി നിർമല സീതാരാമനുമാണ് പട്ടികയിൽ രണ്ടാമതുള്ളത്. ഇതുവരെ ഒമ്പത് ബജറ്റ് പ്രസംഗങ്ങളാണ് നിർമല സീതാരാമൻ അവതരിപ്പിച്ചിട്ടുള്ളത്. അതേസമയം കേരളത്തിൽ ഏറ്റവും കൂടുതൽ തവണ ബജറ്റ് അവതരിപ്പിച്ചിട്ടുള്ളത് കെ എം മാണിയാണ് (13 തവണ). ഇത്തവണ സംസ്ഥാനത്തിൻ്റെ ബജറ്റ് അവതരിപ്പിക്കുന്നത് മുഖ്യമന്ത്രി ആണെന്ന് വിശേഷതയുമുണ്ട്.