തായ്‌വാനിൽ വീണ്ടും ഭൂചലനം; ഒറ്റരാത്രിയിൽ 80-ലേറെ ഭൂചലനങ്ങൾ

Taiwan Earthquake

തായ്‌പേയ്: തായ്‌വാനിൽ വീണ്ടും ഭൂചലനം. കിഴക്കൻ കൗണ്ടിയായ ഹുവാലീനിൽ തിങ്കളാഴ്ച രാത്രിയും ചൊവ്വാഴ്ച പുലർച്ചെയുമായി എൺപതോളം ഭൂചലനങ്ങളാണ് അനുഭവപ്പെട്ടത്. ഇതിൽ ഏറ്റവും തീവ്രതയേറിയ ഭൂചലനം, ഭൂകമ്പമാപിനിയിൽ 6.3 തീവ്രത രേഖപ്പെടുത്തിയതാണ്.

തിങ്കളാഴ്ച രാത്രിയും ചൊവ്വാഴ്ച പുലർച്ചെയും അനുഭവപ്പെട്ട ഭൂചലനത്തിൽ തായ്‌പേയിൽ കെട്ടിടങ്ങൾ തകർന്നു. അതേസമയം ഭൂകമ്പത്തിൽ ആളപായമൊന്നും ഇതുവരെ രേഖപ്പെടുത്തിയിട്ടില്ല. കെട്ടിടങ്ങൾ തകർന്നതിന്റെയും മറ്റും ദൃശ്യങ്ങൾ സാമൂഹികമാധ്യമങ്ങളിൽ പ്രചരിക്കുന്നുണ്ട്.

ഏപ്രിൽ മൂന്നിന് ഹുവാലീനിലുണ്ടായ ഭൂചലനത്തിൽ 14 പേർക്ക് ജീവൻ നഷ്ടപ്പെടുകയും നിരവധി നാശനഷ്ടങ്ങൾ ഉണ്ടാവുകയും ചെയ്തിരുന്നു. 7.2 തീവ്രതയുള്ള ഭൂചലനമായിരുന്നു അന്നത്തേത്. അതിനു ശേഷം മേഖലയിൽ ഇതുവരെ ആയിരത്തോളം തുടർചലനങ്ങൾ അനുഭവപ്പെട്ടിട്ടുണ്ടെന്നാണ് വിവരം.