Ilaiyaraaja: സംഗീതപരിപാടികളുടെ പ്രതിഫലവും ഒരുമാസത്തെ ശമ്പളവും സൈനികരുടെ ക്ഷേമത്തിനായി നല്കും: ഇളയരാജ
Ilaiyaraaja Donates Salary To Defence Fund: അഭിമാനിയായ ഇന്ത്യക്കാരന് എന്ന നിലയിലും രാജ്യസഭാംഗം എന്ന നിലയിലും തന്റെ ഒരുമാസത്തെ ശമ്പളവും സംഗീത പരിപാടികളില് നിന്ന് ലഭിക്കുന്ന പ്രതിഫലവും സംഭാവന ചെയ്യാനാണ് ഇളയരാജ തീരുമാനിച്ചിരിക്കുന്നത്.
ഇളയരാജ
സൈനികരുടെ ക്ഷേമത്തിനായി ദേശീയ പ്രതിരോധ ഫണ്ടിലേക്ക് തന്റെ വരുമാനം സംഭാവന ചെയ്യുമെന്ന് സംഗീത സംവിധായകന് ഇളയരാജ. തന്റെ സമൂഹമാധ്യമ അക്കൗണ്ടുകളിലൂടെയാണ് അദ്ദേഹം ഇക്കാര്യം അറിയിച്ചിരിക്കുന്നത്.
അഭിമാനിയായ ഇന്ത്യക്കാരന് എന്ന നിലയിലും രാജ്യസഭാംഗം എന്ന നിലയിലും തന്റെ ഒരുമാസത്തെ ശമ്പളവും സംഗീത പരിപാടികളില് നിന്ന് ലഭിക്കുന്ന പ്രതിഫലവും സംഭാവന ചെയ്യാനാണ് ഇളയരാജ തീരുമാനിച്ചിരിക്കുന്നത്.
ഈ വര്ഷം ആദ്യം താന് ചിട്ടപ്പെടുത്തിയ സിംഫണിക്ക് ധീരന് എന്ന് പേര് നല്കിയിരുന്നു. വിനോദസഞ്ചാരികളെ കൊലപ്പെടുത്തിയ ഭീകരര്ക്ക് രാജ്യത്തിന്റെ അഭിമാനമായ സൈനികര് തിരിച്ചടി നല്കുമെന്ന് അറിയാതെയാണ് താന് ആ പേര് നല്കിയതെന്ന് അദ്ദേഹം എക്സില് പങ്കുവെച്ച പോസ്റ്റില് പറഞ്ഞു.
ഇളയരാജയുടെ വാക്കുകള് ഇങ്ങനെ
വാലിയന്റ് (ധീരന്), ഈ വര്ഷം ആദ്യം ഞാനെന്റെ ആദ്യത്തെ സിംഫണി ചിട്ടപ്പെടുത്തുകയും അതിന് ധീരന് എന്ന് പേരിടുകയും ചെയ്തിരുന്നു. എന്നാല് മെയ് മാസത്തില് പഹല്ഗാമിലെ നിരപരാധികളായ വിനോദസഞ്ചാരികള് കൊല്ലപ്പെട്ടതിനെ തുടര്ന്ന് നമ്മുടെ, യഥാര്ത്ഥ വീരന്മാരായ സൈനികര്ക്ക് അതിര്ത്തികളില് ധീരത, സാഹസികത, ധൈര്യം, കൃത്യത, ദൃഢനിശ്ചയം എന്നിവയോടെ പ്രവര്ത്തിക്കേണ്ടതായി വരുമെന്ന് ഞാന് അറിഞ്ഞിരുന്നില്ല.
നമ്മുടെ രാജ്യത്തിന്റെ ധീര ജവാന്മാര് ശത്രുക്കളെ മുട്ടുക്കുത്തിമെന്ന കാര്യത്തില് എനിക്ക് പൂര്ണ വിശ്വാസമുണ്ട്. ജയഭേരിഗൈ കൊട്ടടാ, കൊട്ടടാ, ജയഭേരി കൊട്ടടാ, ഭാരതി.
അഭിമാനിയായ ഇന്ത്യക്കാരന് എന്ന നിലയിലും ഒരു പാര്ലമെന്റ് അംഗം എന്ന നിലയിലും ഭീകരതയെ തുടച്ച് നീക്കുന്നതിനും നമ്മുടെ അതിര്ത്തികളെയും ജനങ്ങളെയും സംരക്ഷിക്കുന്നതിനും വേണ്ടി പ്രവൃത്തിക്കുന്ന വീരന്മാരുടെ ധീരമായ പ്രവൃത്തിക്ക് പിന്തുണയായി എന്റെ സംഗീത പരിപാടികളില് നിന്നും പ്രതിഫലവും ഒരു മാസത്തെ ശമ്പളവും ദേശീയ പ്രതിരോധ നിധിയിലേക്ക് സംഭാവനയായി നല്കാന് ഞാന് തീരുമാനിച്ചിരിക്കുന്നു.
