Iran-Israel Conflict : ഹോർമുസ് കടലിടുക്ക് അടച്ചാൽ എണ്ണവില ഇനി കുതിച്ചുയരുമോ?
Iran Parliament Approves Hormuz Strait Closure: ഇന്ത്യയുടെ മൊത്തം ഇറക്കുമതിയായ പ്രതിദിനം 5.5 ദശലക്ഷം ബാരൽ അസംസ്കൃത എണ്ണയിൽ ഏകദേശം 2 ദശലക്ഷം ബാരൽ ഈ ജലപാതയിലൂടെയാണ് എത്തുന്നത്.
Hormuz Strait Closure
ടെഹ്റാൻ: യുഎസ് മൂന്ന് ആണവ കേന്ദ്രങ്ങളിൽ ബോംബിട്ട് തകർത്തതിന് പിന്നാലെ, ലോകത്തിലെ പ്രധാന എണ്ണക്കപ്പൽ പാതയായ ഹോർമുസ് കടലിടുക്ക് അടച്ചുപൂട്ടാൻ ഇറാൻ പാർലമെന്റ് അംഗീകാരം നൽകിയതായി സ്റ്റേറ്റ് മീഡിയ പ്രസ് ടിവി ഇന്ന് റിപ്പോർട്ട് ചെയ്തു. ഈ നീക്കം ആഗോള എണ്ണ, വാതക വിതരണത്തിൽ കടുത്ത പ്രതിസന്ധി സൃഷ്ടിക്കുമെന്നാണ് വിലയിരുത്തൽ.
ഹോർമുസ് കടലിടുക്കിന്റെ പ്രാധാന്യം
ലോകത്തിലെ ഏറ്റവും നിർണായകമായ ചോക്ക്പോയിന്റുകളിലൊന്നാണ് ഹോർമുസ് കടലിടുക്ക്. ആഗോള എണ്ണ, വാതക വിതരണത്തിന്റെ അഞ്ചിലൊന്നും ഈ കടലിടുക്കിലൂടെയാണ് കടന്നുപോകുന്നത്. പേർഷ്യൻ ഗൾഫിനെ അറേബ്യൻ കടലുമായും ഇന്ത്യൻ മഹാസമുദ്രവുമായും ബന്ധിപ്പിക്കുന്ന ഒരു പ്രധാനപ്പെട്ട പാതയാണിത്. ഏറ്റവും ഇടുങ്ങിയ സ്ഥലത്ത് ഏകദേശം 33 കിലോമീറ്റർ വീതിയുള്ള ഈ ചാനൽ ഇറാനെ അറേബ്യൻ ഉപദ്വീപിൽ നിന്ന് വേർതിരിക്കുന്നു. ഈ ഭാഗത്തെ കപ്പൽച്ചാലിന്റെ വീതി വെറും മൂന്ന് കിലോമീറ്റർ മാത്രമാണ്.
സൗദി അറേബ്യ, ഇറാഖ്, യുഎഇ, ഖത്തർ, ഇറാൻ, കുവൈറ്റ് എന്നീ രാജ്യങ്ങളിൽ നിന്നുള്ള എണ്ണ കയറ്റുമതിയുടെ ഭൂരിഭാഗവും ഹോർമുസ് ജലപാതയിലൂടെയാണ് കടന്നുപോകുന്നത്. ഈ കടലിടുക്ക് അടച്ചുപൂട്ടിയാൽ അമേരിക്കയും യൂറോപ്പും മാത്രമല്ല, ഏഷ്യൻ രാജ്യങ്ങളും കടുത്ത പ്രതിസന്ധിയിലാകും.
ഇന്ത്യക്ക് കടുത്ത ആഘാതം
ഇന്ത്യയെ സംബന്ധിച്ചിടത്തോളം, ഹോർമുസ് കടലിടുക്ക് അതീവ പ്രാധാന്യമുള്ളതാണ്. ഇന്ത്യയുടെ മൊത്തം ഇറക്കുമതിയായ പ്രതിദിനം 5.5 ദശലക്ഷം ബാരൽ അസംസ്കൃത എണ്ണയിൽ ഏകദേശം 2 ദശലക്ഷം ബാരൽ ഈ ജലപാതയിലൂടെയാണ് എത്തുന്നത്. ഇറാന്റെ ഈ നടപടി ലോകത്താകമാനം എണ്ണ വില കുത്തനെ ഉയരാൻ കാരണമാകുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. ഇത് ആഗോള സമ്പദ്വ്യവസ്ഥയിൽ വലിയ പ്രത്യാഘാതങ്ങൾ സൃഷ്ടിച്ചേക്കും.
ഇറാൻ-യുഎസ് സംഘർഷം ഹോർമുസ് കടലിടുക്കിലേക്ക് വ്യാപിക്കുകയാണെങ്കിൽ, അത് ആഗോളതലത്തിൽ ഗുരുതരമായ ഊർജ്ജ പ്രതിസന്ധിക്ക് വഴിവെച്ചേക്കാം. സ്ഥിതിഗതികൾ സൂക്ഷ്മമായി നിരീക്ഷിക്കുകയാണെന്ന് വിവിധ ലോകരാജ്യങ്ങൾ അറിയിച്ചിട്ടുണ്ട്.
