GST collections: റോക്കറ്റുപോലെ കുതിച്ച് ജിഎസ്ടി പിരിവ്, തുടർച്ചയായി രണ്ടാം തവണയും 2 ലക്ഷം കോടി രൂപ കടന്നുവെന്ന് റിപ്പോർട്ട്

തിരുവനന്തപുരം: ജിഎസ്ടി (ചരക്ക് സേവന നികുതി) പിരിവ് തുടർച്ചയായ രണ്ടാം മാസവും 2 ലക്ഷം കോടി രൂപ കടന്നുവെന്ന് റിപ്പോർട്ട്. ഇതോടെ ഇന്ത്യൻ സമ്പദ്‌വ്യവസ്ഥയുടെ വളർച്ച മികച്ച രീതിയിൽ മുന്നോട്ട് കുതിക്കുന്നു എന്നുവേണം കരുതാൻ. ജിഎസ്ടി പിരിവ് മെയ് മാസത്തിലേത് 2.01 ലക്ഷം കോടി രൂപയായിരുന്നു. ഏപ്രിലിൽ ഇത് റെക്കോർഡ് തുകയായ 2.36 ലക്ഷം കോടിയിലെത്തിയിരുന്നു.

തുടർച്ചയായ രണ്ടാം മാസവും ഈ നേട്ടം കൈവരിക്കുന്നതിന്റെ ആവേശം ചെറുതൊന്നുമല്ല. 2024 മെയ് മാസത്തിലെ 1.72 ലക്ഷം കോടി രൂപയേക്കാൾ 16.4% അധികമാണ് ഇപ്പോൾ ലഭിച്ചിരിക്കുന്നത് എന്നത് പ്രത്യേകം എടുത്തു പറയണം. ഇത് കഴിഞ്ഞ വർഷത്തെ അപേക്ഷിച്ച് ശക്തമായ വളർച്ചയാണ് കാണിക്കുന്നത്.

ഘടകങ്ങൾ

• കേന്ദ്ര ജിഎസ്ടി (CGST): 35,434 കോടി രൂപ.
• സംസ്ഥാന ജിഎസ്ടി (SGST): 43,902 കോടി രൂപ.
• സംയോജിത ജിഎസ്ടി (IGST): 1.08 ലക്ഷം കോടി രൂപ (ഇറക്കുമതി ചെയ്ത സാധനങ്ങളിൽ നിന്നുള്ള ജിഎസ്ടി ഉൾപ്പെടെ). കഴിഞ്ഞ വർഷം മേയിൽ ഇത് 87,781 കോടി രൂപ മാത്രമായിരുന്നു. ഇറക്കുമതിയിൽ നിന്നുള്ള ജിഎസ്ടിയിൽ 25.2% വർദ്ധനവുണ്ടായി.
  സെസ് (CESS): 12,879 കോടി രൂപ.

Also read – എടിഎം വഴി 500 രൂപ നോട്ടിൻ്റെ വിതരണം നിരോധിക്കുമോ? മറുപടി നൽകി ആർ‌ബി‌ഐ

ആഭ്യന്തര ഇടപാടുകളിൽ നിന്നുള്ള നികുതി പിരിവിൽ 13.7% വർദ്ധനവുണ്ടായതായാണ് കണക്ക്. ഇറക്കുമതി വഴിയുള്ള ജിഎസ്ടി വരുമാനത്തിലെ ഗണ്യമായ വളർച്ചയും മൊത്തം വർദ്ധനവിന് ഒരു കാരണമാണ് എന്നു വിലയിരുത്താം. റീഫണ്ടുകൾക്ക് ശേഷം, മെയ് മാസത്തെ അറ്റ ജിഎസ്ടി വരുമാനം 1,73,841 കോടി രൂപയായിരുന്നു, ഇത് 2024 മെയ് മാസത്തിൽ ശേഖരിച്ച 1,44,381 കോടി രൂപയിൽ നിന്ന് 20.4% വർദ്ധനവ് രേഖപ്പെടുത്തുന്നു.

സംസ്ഥാനങ്ങളുടെ പ്രകടനം

കേരളത്തിൽ ജിഎസ്ടി പിരിവിൽ 24% വർദ്ധനവ് രേഖപ്പെടുത്തിയതോടെ 3210 കോടി രൂപയായി പിരിവ്. മഹാരാഷ്ട്ര (31,530 കോടി രൂപ), കർണാടക (14,299 കോടി), തമിഴ്നാട് (12,230 കോടി), ഗുജറാത്ത് (11,737 കോടി), ഡൽഹി (10,366 കോടി), ഹരിയാന (10,170 കോടി), ഉത്തർപ്രദേശ് (9,130 കോടി) എന്നിവയാണ് ജിഎസ്ടി പിരിവിൽ മുന്നിൽ നിൽക്കുന്ന മറ്റ് സംസ്ഥാനങ്ങൾ.
ജിഎസ്ടി പിരിവ് കൂടുന്നത് മറ്റൊരു സൂചനയും നൽകുന്നുണ്ട്.

രാജ്യത്ത് ഉൽപ്പന്നങ്ങളുടെയും സേവനങ്ങളുടെയും ഉപഭോഗം വർദ്ധിച്ചുവെന്നാണ് ഇതിലൂടെ മനസ്സിലാക്കേണ്ടത്. ബിസിനസ്സ് പ്രവർത്തനങ്ങൾ സജീവമാവുകയും കൂടുതൽ ഇടപാടുകൾ നടക്കുകയും ചെയ്യുമ്പോൾ ജിഎസ്ടി വരുമാനം വർദ്ധിക്കും. ഇത് വ്യാപാര മേഖലയുടെ ഉണർവിനെ സൂചിപ്പിക്കുന്നു. വ്യാവസായിക ഉത്പാദനം കൂടുമ്പോൾ ചരക്കുകളുടെ വിതരണം കൂടുകയും, അതിലൂടെ ജിഎസ്ടി പിരിവ് വർദ്ധിക്കുകയും ചെയ്യും.

ജിഎസ്ടി വ്യവസ്ഥകൾ കൂടുതൽ ഫലപ്രദമായി നടപ്പിലാക്കപ്പെടുന്നതും നികുതിദായകർ നികുതി അടയ്ക്കുന്നതിൽ കൂടുതൽ ശ്രദ്ധിക്കുന്നതും ഈ വർദ്ധനവിന് ഒരു കാരണമാകാം. എന്തായാലും ഉയർന്ന ജിഎസ്ടി പിരിവ് കേന്ദ്ര-സംസ്ഥാന സർക്കാരുകൾക്ക് കൂടുതൽ വരുമാനം ഉറപ്പാക്കുന്നുണ്ട്. ഇത് പൊതുമേഖലാ വികസന പ്രവർത്തനങ്ങൾക്കും സാമ്പത്തിക സുസ്ഥിരതയ്ക്കും ഗുണം ചെയ്യും. ചുരുക്കത്തിൽ, ജിഎസ്ടി പിരിവിലെ ഈ സ്ഥിരമായ വളർച്ച ഇന്ത്യൻ സമ്പദ്‌വ്യവസ്ഥയുടെ കരുത്തും മുന്നോട്ടുള്ള കുതിപ്പും വ്യക്തമാക്കുന്നു.