Kerala Plus One Admission 2025: പ്ലസ് വൺ ആദ്യ അലോട്മെ‍ന്റിന് ശേഷം ഒഴിഞ്ഞു കിടക്കുക 70,000 സംവരണ സീറ്റുകൾ

Plus One Admission

തിരുവനന്തപുരം: പ്ലസ് വൺ പ്രവേശന പ്രക്രിയയുടെ ഭാ​ഗമായി ആദ്യ അലോട്മെന്റ് തിങ്കളാഴ്ച പുറത്തു വരും. ഇതിനു ശേഷം ഒഴിഞ്ഞു കിടക്കുന്നത് 70,000 സംവരണ സീറ്റുകളെന്ന് റിപ്പോർട്ട്. അതിനാൽ ആദ്യ അലോട്മെന്റ് കിട്ടിയില്ലെങ്കിലും ഭയപ്പെടേണ്ടതില്ലെന്നാണ് വിദ​ഗ്ധർ പറയുന്നത്. അടുത്ത അലോട്മെന്റിൽ ഉറപ്പായും സീറ്റു ലഭിക്കുമെന്നും ഇഷ്ടമുള്ള സ്കൂളിൽ ഇഷ്ടമുള്ള വിഷയത്തിനു കിട്ടാനും സാധ്യത കൂടുതലാണെന്നും പറയപ്പെടുന്നു.

ട്രയൽ അലോട്മെന്റിൽ 2,47,428 സീറ്റാണ് ഉൾപ്പെട്ടിരുന്നത്. ഇതിൽ 70,155 സീറ്റ് മിച്ചമായിരുന്നു. സംവരണ സീറ്റുകളിലാണ് ഒഴിവു വന്നത്. അർഹരായ അപേക്ഷകരുടെ എണ്ണം കുറഞ്ഞതാണ് ഇതിനു കാരണം. ഇതിനു മുമ്പുള്ള വർഷങ്ങളിലും ഈ പ്രവണത കണ്ടിരുന്നു. ട്രയൽ അലോട്മെന്റിലെ പ്രവണതയുടെ ആവർത്തനമാകും ആദ്യ അലോട്മെന്റിനു ശേഷവും.

കാരണങ്ങൾ

• വിദ്യാർത്ഥികൾക്ക് ഇതിനെപ്പറ്റി ധാരണയില്ലാത്തതും ആനുകൂല്യങ്ങൾ കൃത്യമായി പ്രയോ​ഗിക്കാത്തതുമാണ് പ്രധാനകാരണം
• അപേക്ഷിക്കുമ്പോഴുണ്ടാകുന്ന പിഴവുകളും കാരണമാകാറുണ്ട്. സംവരണ വിവരങ്ങൾ തെറ്റായി ചേർക്കുന്നതാണ് ഇതിൽ പ്രധാനം.
• ആനുകൂല്യങ്ങൾക്ക് അനുസൃതമായ സ്കൂളുകളും കോമ്പിനേഷനുകളും ചേർക്കാത്തതും കാരണമാണ്.
• ചില സംവരണ വിഭാഗങ്ങളിലെ വിദ്യാർത്ഥികൾക്ക് ഹയർസെക്കൻഡറി വിദ്യാഭ്യാസത്തേക്കാൾ ഐടിഐ, പോളിടെക്നിക് തുടങ്ങിയ തൊഴിലധിഷ്ഠിത കോഴ്സുകളോട് താല്പര്യമുണ്ടായിരിക്കാം.
• ചില ജില്ലകളിൽ അല്ലെങ്കിൽ ചില കോമ്പിനേഷനുകളിൽ സംവരണ സീറ്റുകൾ കുറവായതിനാലും വിദ്യാർത്ഥികൾക്ക് പ്രവേശനം ലഭിക്കാതെ വരാം.

Also read – പ്ലസ് വൺ പ്രവേശനം ജൂൺ 2ന് ആരംഭിക്കും; ഹാജരാക്കേണ്ട സർട്ടിഫിക്കറ്റുകൾ ഇവ

ആദ്യ അലോട്ട്മെൻ്റിനോടൊപ്പം തന്നെ സ്‌പോർട്‌സ് ക്വാട്ടയിലേക്കുള്ള അലോട്ട്‌മെന്റും പ്രസിദ്ധീകരിക്കുന്നതാണ്. രണ്ടാമത്തെ അലോട്ട്‌മെന്റ് ജൂൺ 10നും മൂന്നാമത്തെ അലോട്ട്‌മെന്റ് ജൂൺ 16നും പ്രസിദ്ധീകരിക്കുമെന്നാണ് വിവരം. അലോട്ട്‌മെന്റുകൾ പൂർത്തീകരിച്ച ശേഷം ജൂൺ 18ന് പ്ലസ്‍ വൺ ക്ലാസുകൾ ആരംഭിക്കുമെന്ന് വിദ്യാഭ്യാസമന്ത്രി വി ശിവൻകുട്ടി നേരത്തെ അറിയിച്ചതാണ്. ഈ വർഷം പ്ലസ് വൺ പ്രവേശനത്തിനായി ആകെ 4,62,768 അപേക്ഷകളാണ് ലഭിച്ചത്. ട്രയൽ അലോട്ട്‌മെന്റ് മെയ് 24ന് പ്രസിദ്ധീകരിച്ചിരുന്നു.