BTS’ RM, V Are Back: കാത്തിരിപ്പിന് അവസാനം, ‘ആ‍ർമി’ക്ക് ഇന്ന് ഡബിൾ ഹാപ്പി, തിരിച്ചെത്തി ആർഎമ്മും വിയും

രണ്ട് വർഷത്തെ നിർബന്ധിത സൈനിക സേവനം പൂർത്തിയാക്കി ബിടിഎസിന്റെ ആർഎമ്മും ( കിം നാം-ജൂൻ ) വിയും ( കിം തെയ്-ഹ്യുങ് ). ജിന്നിനും ജെ-ഹോപ്പിനും ശേഷം തിരിച്ചെത്തുന്ന മൂന്നാമത്തെയും നാലാമത്തെയും ബാൻഡ് അംഗങ്ങളാണ് ഇരുവരും. സാക്സോഫോൺ വായിച്ച് കൊണ്ട് പുറത്തെത്തിയ ആർഎമ്മിന്റെയും കൂടെയെത്തിയ വിയുടെയും ചിത്രങ്ങൾ സോഷ്യൽ മീഡിയയിൽ വൈറലാവുകയാണ്.

2023 നവംബർ 22-നായിരുന്നു ബിടിഎസ് കമ്പനിയായ ബിഗ്ഹിറ്റ് മ്യൂസിക് BIGHIT മ്യൂസിക്, ആർഎമ്മും വിയും നിർബന്ധിത സൈനിക സേവനം നിർവഹിക്കുന്നതിനുള്ള എൻറൈൽമെന്റ് പ്രക്രിയ ആരംഭിച്ചതായി പ്രഖ്യാപിച്ചത്. തുടർന്ന് ഡിസംബർ 11-ന് ഇരുവരും സൈനിക സേവനം ആരംഭിച്ചു. ആർഎം ആക്ടീവ് ഡ്യൂട്ടി സൈനികനായി സേവനമനുഷ്ഠിച്ചപ്പോൾ, വി മിലിട്ടറി പോലീസ് കോർപ്സിന്റെ സ്പെഷ്യൽ ടാസ്‌ക് ഫോഴ്‌സിന് കീഴിലാണ് സേവനമനുഷ്ഠിച്ചത്.

ജൂൺ അവസാനത്തോടെ ബിടിഎസിലെ മുഴുവൻ അം​ഗങ്ങളും മടങ്ങിയെത്തുമെന്ന സന്തോഷത്തിലാണ് ആരാധകവൃന്ദമായ ആർമി. നാളെ, ജൂൺ 11ന് ബിടിഎസിലെ ഇളയ അംഗങ്ങളായ ജിമിൻ, ജം​ഗ്കുക്ക് എന്നിവർ തിരികെ എത്തും. അതേസമയം സു​ഗ ജൂൺ 21നാണ്  സൈനിക സേവനം പൂർത്തിയാക്കുന്നത്.

ദക്ഷിണ കൊറിയയിലെ നിയമമനുസരിച്ച് 18നും 28നും ഇടയില്‍ പ്രായമുള്ള ആരോഗ്യവാന്‍മാരായ എല്ലാ പുരുഷന്‍മാരുംനിർബന്ധമായും സൈനിക സേവനത്തിലേര്‍പ്പെട്ടിരിക്കണം. ഇതുപ്രകാരമാണ് ബിടിഎസ് പാട്ടിൽ നിന്ന് ഇടവേളയെടുത്ത് സൈനികസേവനത്തിനിറങ്ങിയത്.