Indian Football: ഇന്ത്യന്‍ ഫുട്‌ബോളിനെ രക്ഷിക്കൂ; ഫിഫയോട് അപേക്ഷിച്ച് ഛേത്രിയും ഗുര്‍പ്രീതും ഉള്‍പ്പെടെയുള്ള താരങ്ങള്‍

Gurpreet Singh Sandhu, Sandesh Jhingan, and Sunil Chhetri

ഐഎസ്എല്‍ പ്രതിസന്ധി തുടരുന്നതിനിടെ ഫിഫയുടെ ഇടപെടല്‍ അഭ്യര്‍ത്ഥിച്ച് താരങ്ങള്‍ രംഗത്തെത്തി. മുമ്പെങ്ങും കണ്ടിട്ടില്ലാത്ത തരത്തിലുള്ള പ്രതിസന്ധിയിലൂടെയാണ് ഐഎസ്എല്‍ കടന്നുപോകുന്നത്. പുതിയ സീസണ്‍ എന്ന് തുടങ്ങാനാകുമെന്നതില്‍ അവ്യക്തത തുടരുകയാണ്. ഫെബ്രുവരിയില്‍ തുടങ്ങാനാകുമെന്ന് പ്രതീക്ഷിക്കുന്നുവെങ്കിലും പ്രശ്‌നങ്ങള്‍ ഇനിയും അവസാനിച്ചിട്ടില്ലെന്നാണ് റിപ്പോര്‍ട്ട്. ഈ സാഹചര്യത്തിലാണ് താരങ്ങള്‍ ഫിഫയുടെ ഇടപെടല്‍ തേടിയത്.

സുനിൽ ഛേത്രി, ഗുർപ്രീത് സിംഗ് സന്ധു, സന്ദേശ് ജിങ്കൻ തുടങ്ങിയ താരങ്ങളാണ് ഫിഫ ഇടപെടണമെന്ന് ആവശ്യപ്പെട്ടത്. എല്ലാ താരങ്ങളും ഒരു വീഡിയോയിലൂടെയാണ് അഭ്യര്‍ത്ഥന ഉന്നയിച്ചത്. ഇത് ജനുവരി മാസമാണ്. ഈ സമയത്ത് തങ്ങളെല്ലാം ഐഎസ്എല്‍ കളിക്കേണ്ടതായിരുന്നുവെന്നും പറഞ്ഞ് ഗുര്‍പ്രീതാണ് വീഡിയോക്ക് തുടക്കമിടുന്നക്.

എന്നാല്‍ ഭയവും നിരാശയും കാരണം അറിയാവുന്ന ചില കാര്യങ്ങളെങ്കിലും ഉറക്കെ പറയാന്‍ തങ്ങള്‍ നിര്‍ബന്ധിതരാകുന്നുവെന്ന് ജിങ്കന്‍ പറഞ്ഞു. താരങ്ങളും, ജീവനക്കാരും സംരക്ഷണവും മികച്ച ഭാവിയും, ആരാധകര്‍ വ്യക്തതയും അര്‍ഹിക്കുന്നുവെന്ന് സുനില്‍ ഛേത്രി പറഞ്ഞു.

Also Read: ISL: ഐഎസ്എല്‍ ‘തീര്‍ന്നിട്ടില്ല’ ! ഇന്ത്യന്‍ സൂപ്പര്‍ ലീഗിന് രണ്ടാം ജന്മം; ഫെബ്രുവരിയില്‍ തുടങ്ങും?

ഇന്ത്യൻ ഫുട്ബോൾ ഭരണസമിതിക്ക് ഉത്തരവാദിത്തങ്ങൾ നിറവേറ്റാൻ കഴിയുന്നില്ലെന്ന് താരങ്ങള്‍ വിമര്‍ശിച്ചു. തങ്ങള്‍ തളര്‍ന്നിരിക്കുകയാണ്. ഇന്ത്യൻ ഫുട്ബോളിനെ രക്ഷിക്കാൻ ആവശ്യമായതെല്ലാം ചെയ്യാൻ ഫിഫയോട് അഭ്യർത്ഥിക്കുന്നു. സൂറിച്ചിലെ അധികാര കേന്ദ്രങ്ങളിലേക്ക് ഈ സന്ദേശം എത്തുമെന്ന് പ്രതീക്ഷിക്കുന്നുവെന്നും താരങ്ങള്‍ പറഞ്ഞു.

ഇതില്‍ രാഷ്ട്രീയമില്ല. ഏറ്റുമുട്ടലിന്റെ അടിസ്ഥാനത്തിലല്ല, ആവശ്യത്തിലൂന്നിയാണ് ഇത് പറയുന്നത്. മാനുഷിക, കായിക, സാമ്പത്തിക പ്രതിസന്ധികളെ നേരിടുകയാണ്. എത്രയും വേഗം രക്ഷാപ്രവര്‍ത്തനം നടത്തണം. ഫുട്‌ബോള്‍ കളിക്കാന്‍ ആഗ്രഹമുണ്ട്. ദയവായി അതിന് സഹായിക്കണമെന്നും താരങ്ങള്‍ ആവശ്യപ്പെട്ടു.

വീഡിയോ കാണാം